CaribSeek | CaribSeek Books | Curaçao Books | Korsou den siglo 20

CaribSeek Books
CaribSeek


 
 

Sponsors

 
3. Ekonomia, problema insuperabel

Isla di Kòrsou, ku su pobresa normal, sin nada den supsuela, sin mineral, sin mas ku poko fosfato, sin awaseru, ku poko tera fértil, na kantidat limitá, ku un solo ku ta kima tur loke ke purba nase den sekura, ku su bientu kargá di kalor den dia i su aire fresku anochi, konstante, ku nunka kier laga di purba duna nos un tiki alivio, e isla akí no tabatin nada di ofresé na ekonomia mundial sino un haf natural famoso, su solo i tiki playa pa esnan di tera mas friu por disfrutá. Su hendenan, di bon naturá, humilde i simpel a mira ku ta e haf, ku solo, ku bientu so a ked'é.

Algun ta probechá di e haf tur ku tin. Hulandesnan a haña e chèns di nan bida semper, promé pirateria i despues pa transportá tur sorto di kos, di katibu te awor petroleo i a pone Kòrsou riba mapa. Pa transbordo di karga, Venezuela no tin mester di nos dje tantu ei mas for di tempu ku Gomez a traha su karetera trasandina . Bapornan "El Libertador" i "Baralt" no ta eksistí mas. Haf ainda por ofresé algu di trasbordo pasobra La Guayra apénas ta kuminsá. Ma pronto esei tambe lo keda redusí.

Turismo, ta kuminsá, pero ta poko hende tin eksperensha den e asuntu akí i e fasilidatnan ta redusí. Ta keda solamente refineria, ku ta traha ku petroli ku ta bini di Lago di Maracaibo, pero no den barkunan chikitu mas, den poko tènker muchu mas grandi, redusiendo asina trabou pa nos hendenan. Tur kos tin di bini djafó, kunukunan ta bashí, paña, alimento, sapatu tur kos ta importá i nos hendenan di fishi ya no tin muchu kos di hasi. Kosedónan di ántes, ku tabata hopi, a baha drástikamente. Awor kiko nos ta mira? Ku es un empresa ku tantu nos ta konfia riba dje, ta kuminsá su strimlaining, ta deskartá un kantidat di kos ku e mes tabata hasi. Tur ta pasa den man di otro kompanianan, transporte di riba isla mes, trahamentu di barí i bleki pa zeta (WESCAR) , un kantidat di puesto di refineria ta pasa pa partikular, persona i empresanan chikí, ku nunka di nan bida por garantisá e loke refineria mes tabata duna.

E pueblo ta sinti ku suela ta tambaleá bou di su pia. Algun kompania ku a bini ta kuminsá ku furia, pero despues ta para na nada, sea pasobra e produkto no ta dje bon ei (fabrika di chukulati) òf pasobra otro kaminda por haña man di obra hopi mas barata (Texas Instruments).

< Anterior | Siguiente >
 

 



 

Content © Amado E.J. Römer 1997 - Copyright © CaribSeek 2003 - All Rights Reserved