CaribSeek | CaribSeek Books | Curaçao Books | Korsou den siglo 20

CaribSeek Books
CaribSeek


 
 

Sponsors

 
3. Ekonomia ta stanka

Henter e tempu ku ta pasando akí, ta keda marká pa un retroseso di e bonansa, ku nos a konosé durante i imediatamente despues di e di dos guera mundial.

E fundeshi di ekonomia di Kòrsou, su refineria, despues di kuminsá strimlain, ta bai outomatisá, kos normal den un mundu moderno. Pero ku esei e pueblo ta mira su oportunidat pa trabou keda redusí. E kosnan ku ántes kompania mes ta hasi, ta pasa pa man di otro kompanianan mas chikí ku nunka por duna e mes un rekompensa pa e trabou, manera Shell tabata duna. Esun ku ta sintié ta e trahadó mes: pa e mes trabou e ta bai haña ménos: ménos salario i ménos previshon sosial.

Kompanianan nobo, ku gobièrnu kier atraé, sea ta keda sin resultá òf ta frakasá. Hotèlnan manera semper ta keha ku no tin sufisiente entrada. Ta difisilísimo pa kontrolá kiko tin di bèrdat, si bo mira nan ta hisa kos kasi nobo tira 'fo i kambia pa e mes kosnan kompletamente nobo (kaso Hilton). Di partí di e sektor akí, no tin ni e mínimo komprenshon pa loke pueblo ta pasa den. Ta parse ku tur kos ta bai stanka i ta ekonomia mester perkurá pa e pueblo por biba. Desempleo ta krese sin midí i no tin nada ku ta parse ku lo por par'é.

Hasta tin miedu pa kuminsá ku algu nobo, si bo no sa nunka ki banda polítika por garabu. Òf lo bo mester konsedé ku tur sorto di kos. Kuantu korupshon esaki a trese den nos mundu di Kòrsou, ta kos ku nunka lo salí na kla. Semper komersiantenan i empresarionan ta keha, ma semper tin un ke otro ku ta probechá i p.e. keda sin paga belasting, sin kontribuí na Sociale Verzekeringsbank i ta saka probecho di situashon konfuso.

< Anterior | Siguiente >
 

 



 

Content © Amado E.J. Römer 1997 - Copyright © CaribSeek 2003 - All Rights Reserved