Sponsors

 
2. Poder polítiko bek den man di esnan ku a dirigí "kolonia"

Despues ku na aña 1949 Partido Nacional di Pueblo logra viktoria basta grandi, ta sigui e wega polítiko mas grandi ku pueblo a konosé. E kuestion di kibra "quorum" (perkurá pa no tin e kantidat nesesario pa por tene reunion di Staten i di eilandsraad dor di keda sin firma e lista di presensia), ta kos di tur dia.

E wega di opstrukshon akí ta stroba tur desaroyo positivo i konstruktivo. Esaki ta krea impreshon di un situashon hopi steril. No por goberná kasi i pronto lo tin otro elekshon pa Staten i mester yega na firmamentu di un Statuut, ku ta garantisá poblashon su outonomia tan deseá.

Ironia di e situashon ta ku no ta Gomez, profeta pa pueblo, kende su ideanan tòg a sali den Statuut, ma su kontrinkante polítiko Efrain Jonckheer, desendiente di e gremio ku semper tabata na mando, ta bai Hulanda i ta sinta firma e dokumento, un di esunnan mas importante pa Kòrsou. Un ironia grandi, pero realidat ku pueblo i mandatarionan mes a krea. E gòlpi akí pa Gomez mester tabata formidabel i hos no ta kere ku nunka mas el a rekuperá kompletamente. Resultado di su lucha, su ideal, despues di tantu estudio i trabou, ta keda firmá, no pa e mes sino pa su atversario polítiko, di kapasidat sigur inferior i salí di e grupo ku presisamente e kier a hala un banda.

Di otro banda, pa Kòrsou mes, resultado di elekshon pa eilandsraad ta resultá den un viktoria pa Partido Nashonal.

< Anterior | Siguiente >
 

Content © Amado E.J. Römer 1997 - Copyright © CaribSeek 2003 - All Rights Reserved