CaribSeek | CaribSeek Books | Curaçao Books | Korsou den siglo 20

CaribSeek Books
CaribSeek


 
 

Sponsors

 
2. Polítika kier sigui hunga ku sintimentu di pueblo

Polítikonan tur lo mester batí pechu i rekonosé ku ta tur a sinta hunga ku sintimentu di pueblo. Ta simplemente a trata di kohe poder i mantené poder. E grandinan di ántes kier sigui ta grandi i si mester kumpra pueblo ta hasié. Algun yu di pueblo ku a subi, ta parse infektá di e mes sintimentunan aki. Hasta hende sin kapasidat sufisiente ta sali elegí i ta sinta pòrnada den legislatura durante añanan largu, sin e mínimo di kontribushon di nan parti. E koalishon di islanan ta pone ku Kòrsou tin di baha kabes, maske un partido, ku e ta deseá saka muchu mas voto ku tur sobrá huntu.

Elementonan mihó prepará ku ta bolbe di Hulanda, lo kier un kambio tambe, pero pa bo logra siguridat na trabou, lo abo mester sigui e liña determiná pa partidonan eksistente i asina hopi ta baha kabes i no ta mira nada den un lucha. Esnan ku a lanta partido nobo ta kai den e mes sistema bieu despues di korto tempu. Tabatin hende ku idealismo, pero problema interno mes tambe ta kibra nan forsa. "VITO" ta akusánan i ta bringanan, presisamente pa e motibu akí, pero tur kos ta sigui meskos. N.V.P. kada dia ta debilitá mas i mas i Partido Demokraat ta sinti su mes doño di Kòrsou. E eksponente prinsipal lo mester bira gobernador di Kòrsou. Ya kaba tin un boneriano "di famia" ku a logra, pero mr. dr. N. (Cola) Debrot ta pará riba e weganan ku ta turna lugá. Ta inkonsebibel ku den un situashon manera Kòrsou tabata lo por a pone e eks-promé ministro E. Jonckheer komo gobernador, lo tabata kolmo di falta di vishon. E situashon ni polítikamente no ta kumbiní ningun hende.

Di partí di polítika no por a spera muchu kos positivo den e añanan akí. Pero tin e otro faktornan ku ta mas bien negativo ta traha: diferenshanan rasial, desempleo kresiente, korupshon i un falta di rekonosementu di balor di e pueblo i di su dignidat. Algu ta kushi pero polítika ta sigui su wega di semper.

< Anterior | Siguiente >
 

 



 

Content © Amado E.J. Römer 1997 - Copyright © CaribSeek 2003 - All Rights Reserved