You are here

Istoria Kortiku Di Hudiunan Di Kòrsou

  • Sharebar
Charles Gomes Casseres
Istoria Kortiku Di Hudiunan Di Kòrsou

Dediká na Pueblo di Kòrsou

Introdukshon

Pa basta tempu kaba ta eksistí den diferente sektor di komunidat di Kòrsou e deseo pa sa mas di e istoria di un partí di pueblo di Kòrsou ku te awe no a ser publiká na papiamentu.

Ta trata di e istoria di mas di 3 siglo di hudiunan di Kòrsou. No ku e istoria aki nunka a ser. investigá, dokumentá i publiká na otro lenga. Nos ta fortuná di tin e obranan maestral di Dr. Isaac i Suzanne A. Emmanuel, History Of The Jews Of The Netherlands Antilles, den 2 tomo ku un total di 1165 página, i ademas e estudio publiká promé ku esei riba e sementerio antiguo na Blenheim, tambe di Dr. Isaac Emmanuel, Precious Stones Of The Jews Of Curaçao, den 1 tomo di 584 página.

Den algun otro buki tambe a yega di sali artíkulonan riba e istoria aki skirbí na hulandes i na ingles, por ehèmpel den Encyclopaedie Van De Nederlandse Antillen, den Oranje En De Zes Caraibische Parelen di man di Is. Jessurun Cardozo, S.A.L. Maduro i Jossy M.L. Maduro, den Historie En Oude Families di Dr. Ds. A.J.C. Krafft, miéntras ku e istoriador Dr. Johan Hartog a dediká vários kapítulo i pasahe di su Geschiedenis Van De Nederlandse Antillen, 4 tomo, na istoria di hudiunan di Kòrsou.

Kontures, na nos saber ningun di nan te ainda no a ser tradusí na papiamentu. Ta sosodé ku na fin di aña pasá Sosiedat pa Historia di Kòrsou a konvidámi pa tene un charla pa nan riba e tópiko en kuestion. Mi a hasié na papiamentu uzando komo guia un istoria kondensá ku mi a yega di skirbi na hulandes pa e dokumentario na televishon hulandes di 'NOS': Antilliaans Verhaal.

E interes i e respòns ku mi a haña riba e charla ei tabata di tal índole ku el a animámi pa un dia skirbi un istoria kòrtiku riba hudiunan di Kòrsou na papiamentu. Mester bisa ku e Sosiedat mes a kuminsá saka periódikamente pida pida di mi charla na papiamentu den nan Boletin, pero por supuesto esei no ta turna lugá di un buki.

Suerte ta ku mi amigu Lio Capriles, gerente general di Maduro & Curiel' s Bank, lesando de bes en kuando e pidanan ku tabata sali den Boletin di Sosiedat pa Historia a puntrami si mi no por skirbi un teksto kompleto, kisas un tiki mas ekstenso, pa 'Nos Banko' publik'é komo un servisio mas na komunidat di Kòrsou. I asina pues e istoria kòrtiku aki a bin ser realisá.

Ta kustumber ku un obra riba istoria ta kontené anotashonnan pa indiká di unda e datonan istóriko a ser saká. Sinembargo pa dos rason mi no a kumpli ku e bon regla ei: pa di promé e karakter di mi obra ta pa duna un bista general, den un forma kompakto i espesialmente fásil pa lesa, i pa di dos e anotashonnan lo a resultá monótono, ya ku fuera di algun eksepshon i algun dato ku mi mes a deskubrí den mi eskrutinionan, kasi tur ta saká for di History of The Jews of The Netherlands Antilles di Dr. Isaac and Suzanne A. Emmanuel i di Precious Stones of The Jews of Curaçao di Dr. I.S. Emmanuel. Ta bon pa remarká sí, ku tantu e eskoho di e datonan istóriko komo nan interpretashon i e dedukshonnan saká for di nan ta di mi mes.

Finalmente, un 'masha danki' ta na su lugá na Maduro & Curiel’s Bank ku a hasi publikashon di e obra aki posibel I na mi kasá, Ruth, ku t lesa tur loke mi produsí I ta mi krítiko mas severo, pero semper sumamente konstruktivo. Na Chila de Haseth danki tambe pa korekshon di mi ortografia di papiamentu i pa su sugerenshanan valioso.

Kòrsou, 25 di yüli 1990

Charles Gomes Casseres.

Tokante ''Istoria Kortiku Di Hudiunan Di Kòrsou"

2° edishon

"Istoria Kortiku Di Hudiunan Di Kòrsou" was published for the first time on Caribseek Books on December 18th, 2003, with the kind permission of the author.

Content © Charles Gomes Casseres 1990

Category: