You are here

1. Yegada Di E Prome Hudiu Riba Kòrsou

  • Sharebar

Riba dia 29 di yüli di aña 1634 e promé hudiu a trapa pia riba tera di Kòrsou. Su nòmber tabata Samuel Cohen. E tabata e intérprete na bordo di e flota hulandes bou di komando di Johan van Walbeeck ora ku riba e fecha ei esaki a konkistá Kòrsou di spañónan. Asina a bini un fin na e dominio spañó di nos isla ku a dura 135 aña, pa ta mas eksakto di 1499 ora Alonso de Ojeda a deskubrí nos tera te na e konkista aki pa hulandesnan di West Indische Compagnie.

Pa su konosementu di spañó Van Walbeeck a nombra Samuel Cohen kapatas di e mas o ménos 75 indjannan ku hulandesnan a permití keda riba Kòrsou. E indjannan aki tabata papia spañó ku nan a siña durante e 5 generashonnan ku periodo spañó di nos isla a dura.

Finalmente, un 'masha danki' ta na su lugá na Maduro & Curiel's Bank ku a hasi publikashon di e obra aki posibel i na mi kasá, Ruth, ku ta lesa tur loke mi produsí i ta mi krítiko mas severo, pero semper sumamente konstruktivo. Na Chila de Haseth danki tambe pa korekshon di mi ortografia di papiamentu i pa su sugerenshanan valioso.

Samuel Cohen no a keda aki masha largu. Ya un 8 aña despues nos ta kontra su nòmber i firma den dokumentonan di e sélebre sinagoga portugues di Amsterdam. Tampoko Cohen no a establesé un kongregashon hudiu na Kòrsou, anke tin indikashon ku el a logra konvensé algun otro hudiu ' portugues' di Amsterdam pa bin establesé na Kòrsou. Pero no ta kabe duda ku ta ku yegada di Samuel Cohen riba Kòrsou na 1634 ku istoria di hudiunan na Kòrsou a kuminsá.