You are here

10. Konstrukshon Den Stat

  • Sharebar

Poko aña despues e poblashon hudiu bibá den stat tabata asina kuantioso ku nan mester a establesé un sinagoga den Punda, aparte di esun ku nan tabatin den nan kunuku De Hoop. En total nan a konstruí 4 sinagoga den Punda. Esun promé na 1674. Na 1690 e sinagoga di 1674 mester a ser remplasá pa un nobo, pa na 1703 nan konstruí unu hopi mas grandi, eksaktamente riba e mésun sitio kaminda e aktual sinagoga ta pará. Den abla di hudiu di Kòrsou el a haña e nòmber di 'snoa' òf 'znoa', sin duda algun un kontrakshon di 'esnoge', e moda ku nan tabata rama esun di Amsterdam. E komunidat hudiu di Kòrsou a sigui krese i floresé i di aña 1760 pa ±1800 tabata konstituí mas di mitar di e poblashon blanku di Kòrsou. Hopi di e edifisionan den Punda a ser konstruí dor di nan. Tabatin un kaya ku e nòmber di Jodenstraat, otro Jodenkerkstraat, otro tabata rama Hanchi di Baño, komo ku e baño ritual di e kongregashon tabata situá eiden. Te dia djawe nos por weta riba fachada di 4 edifisio monumental den Punda e aña ku nan a ser konstruí indiká na fecha abraiko (nan ta kuminsá ku 5mil tantu). Un edifisio tin den su tòp ku lèter abraiko e nòmber di su doña: Beth Levi (=Kas di Levi).

Riba nan kunukunan nan tambe a konstruí loke nos ta rama awendia 'landhuizen'. Un bunita ehèmpel ta Landhuis Habaai, ku awor ta pertenesé na Diósesis katóliko di Willemstad. Su nòmber aktual ta un variashon riba nòmber di un di su promé doñonan: Josuah Gabay Henriquez. Gabay ta un faro hudiu konosí, komo tambe e título di un atministrador di un komunidat hudiu.