You are here

12. E Snoa Na Otrabanda

  • Sharebar

Na fines di siglo diesocho poblashon hudiu di Kòrsou a yega su tòp i tabata monta 2000 alma. E stat denter di muraya a yena i hürnan a subi hopi. E hudiunan ménos pudiente, di kua tabatin basta, no por a paga e hürnan haltu i pokopoko a kuminsá bai biba na Otrabanda tambe. Pero esei a trese un problema kuné. Komo ku krusa St.Annabai den boto di rema riba Shabat ta konstituí un kiebra di e mandamentu ku ta prohibí tur sorto di trabou riba Shabat, e habitantenan hudiu di Otrabanda a pidi Direktiva di Snoa di Funda pèrmit pa nan traha un snoa den Otrabanda. Despues di basta trámite i diskushon e snoa materno di Funda na 1746 a konstruí un snoa pa nan den Otrabanda. E tabata na e aktuallote numerá Breedestraat 129, ku ta e tereno bashí pabou di e pakus Kadewe. Su nòmber tabata Neve Shalom (Habitashon di ras). E snoa di Otrabanda tabata pues un filial di esun materno di Funda i tabata kai bou di su hurisdikshon.

Den poko tempu e situashon ei a bin kousa mashá frikshon entre e kongregashon di Otrabanda i esun di Funda, ya ku esun di Otrabanda no ker a aseptá mas e tutelahe di parti di esun di Funda. Nan tabata eksigí outonomia. E kontroversia a bai ta eskalá i a bin kulminá den un berdadero guera fraterno. Den Funda, na Otrabanda, te asta den sementerio tabatin bringamentu formal, tin biaha ku garoti, palu òf rema, ki ora ku e militantenan di e dos kongregashonnan kontra ku otro. E konflikto a turna un enbergadura asina grandi ku el a desbaratá bida ekonómiko di hinter isla di Kòrsou. Pa evitá rió Dirèktùr di Kòrsou i tambe e dos partidonan konserní a hiba e asuntu dilanti te na Staten Generaal di Hulanda. Finalmente un intervenshon personal di Prens Willem IV pa medio di un proklamashon fechá 1750, skirbí na hulandes i portugues, a logra trese ras bek den e komunidat hudiu. E kongregashon di Otrabanda a haña shèrtu grado di outonomia den materianan ku ta konserní nan mes, pero nan mester a aseptá di keda ofisialmente bou di hurisdikshon di e snoa di Funda. Pa 1815 práktikamente no tabatin hudiu ta biba den Otrabanda mas. Nan a bai biba den kas ku nan a konstruí den e barionan nobo pafó di muraya di Willemstad: den Pietermaai, Pen, Scharloo. Por konsiguiente kongregashon Neve Shalom di Otrabanda na 1817 a sera su portanan i a stòp di eksistí komo tal. Na 1864 e Snoa di Funda a bende e tereno kaminda esun di Otrabanda a yega di ta situá - e edifisio di e snoa ya no tabata eksistí mas - pa fls. 4.655,-- ku e konosido famia di skreinwerker di Otrabanda, Rib.