You are here

13. Importansha Di E Komunidat Hudiu Di Korsou Pa Fin Di Siglo Diesocho

  • Sharebar

Pa fines di siglo 18 e komunidat hudiu di Kòrsou tabata esun mas grandi, mas importante, i mas riku di Nuevo Mundu. E tabata duna yudansa finansiero pa konstrukshon di sinagoga òf sementerio di komunidatnan nobo den hemisferio manera esnan di Newport (Rhode Island), New York (N.Y.), Kingston (Jamaica), Sto Eustatius, Philadelphia (Pa.), Charleston (N.C.), Caracas (Ven.), Rio Hacha (Col.), St.Thomas (Virgin Islands), Paramaribo (Sur.) i Colon (Panama).

Te dia djawe e kongregashon di Newport (R.I.) i di New York ta dediká un reso riba dia di Yom Kipur pa bienestar di komunidat di Kòrsou komo gesto di agradesimento pa ayudo ku nan a yega di haña den pasado.

Komunidat hudiu di Kòrsou tambe tabata duna su aporte periódikamente na e poko komunidatnan i skolnan sefardita ku a keda funshoná na Tera Santa (e aktual Estado di Israel) despues di Diáspora, ku ta e nòmber griego pa e dispershon di hudiunan den hinter mundu komo resultado di destrukshon pa romanonan di e Tèmpel di Yerusalèm na aña 70 di Era Komun.