You are here

15. Kuminsamentu Di Nabegashon Fo'i Kòrsou

  • Sharebar

Pa falta di sufisiente konekshon marítimo den regio pronto hudiunan a dediká nan mes na nabegashon. Nan tabata konstruí barku i nabegá nan, ya sea komo doña, kapitan òf sobrekargo. Ya na 1652, solamente un aña despues di e promé establesimentu hudiu na Kòrsou, nos ta kontra ku nan ta nabegá i trafiká ku nan mes barkunan den mar Karibe. Den dokumentonan di e tempu ei nos ta haña nòmber di un Manuel Namias de Crasto i di un Manuel Levy Mendes. Den un deklarashon di un no-hudiu fechá 1726 ta pará ku 'mayor parti di nabegashon ta den man di hudiunan di Kòrsou.' Ya den e promé 60 añanan despues di e di dos establesimentu di hudiu na Kòrsou na aña 1659, hudiu sefardita di Kòrsou tabata poseé no ménos ku 200 barku. Na fin di siglo 19 e firma mas importante di e tempu ei, A. J. Jesurun ya tabatin komo 100 barku den su servisio.