You are here

17. Hudiu Pober

  • Sharebar

Ta eksistí un idea popular eróneo ku hudiunan di Kòrsou tur tempu a pertenesé na e klase riku. Echonan istóriko sinembargo ta mustra ku esaki no ta korekto. Den un karta fechá 18 di yüni di 1736 ku Dirèktùr Juan Pedro van Collen ta skirbi Kamer di W.I.C na Amsterdam,e ta pidi nan pa 'en adelante no duna pasport na mas famia pober di e nashon hudiu' pa nan no para bira un karga pa Estado. E último aki ta kos ku afortunadamente nunka no a yega di sosodé, ya ku pa medio di un serie di sosiedat i fondo sosial/karitativo, di kua algun ta eksistí i ta aktivo te ku dia di awe, kongregashon hudiu di Kòrsou semper a sabi di sòru pa su miembronan ménos privilegiá.

Un otro indikashon di posishon sosial di e imigrantenan hudiu por ser destilá for di e tumbanan den e sementerio di Blenheim. Na Kòrsou no tin un solo tumba ku eskudo di noblesa di e difunto, miéntras ku na e sementerio hudiu na Ouderkerk, Amsterdam, kaminda nan koreligionarionan ta derá, tin un gran kantidat di tumba ku eskudo eráldiko. Evidentemente e klase di imigrantenan pa Kòrsou tabata di un nivel mas umilde. Un konfirmashon mas nos ta haña den e buki 'Reizen in West lndie' di man di Ds. G.B. Bosch ku a bishitá nos islanan den añanan rònt di 1820. Domi Bosch ta skirbi ku den hanchinan smal di Funda bo ta kontra ku 'un kantidat di hudiu pober' i mas aleu ku 'den e gremio hudiu tin espesialmente hopi hende pober, fuera di algun hopi pudiente'. Un prueba mas ta e lista di e belasting di 6% riba tur bo bienes ku Dirèktùr di Kòrsou mester a imponé riba delaster un abitante pa por paga e suma di reskate na e korsario franses, Cassard, pa asina libra nos di su invashon i di destrukshon di nos stat na aña 1713. Di 200 kabes di famia ku mes ter a paga e impuesto aki solamente 90 tabata hudiu, i di e 33nan di mas haltu no mas ku 10 tabata hudiu, ora ku den e tempu ei hudiunan tabata algu ménos ku mitar di e poblashon blanku di nos isla. Ekspresá na plaka, di e total di 115.000 florin ku Cassard a bin aseptá finalmente komo suma di reskate,-despues di hopi negosashon i bidermentu ku un komishon integrá tambe pa dos komersiante hudiu- e kontribushon hudiu tabata 35.460 florin òf sea un 30%. E 70% sobrá a ser lantá for di e poblashon prinsipalmente protestant, entre kua hopi doña di kunuku, funsionario di West lndische Compagnie i komersiante. E mésun imágen nos ta haña tambe ora nos kompará e kantidat di katibu pertenesiente na protestant i na hudiu riba e listanan di propiedat di katibu di e tempunan ei. Aki ta bon pa remarká sinembargo ku protestantnan tabata semper mas inkliná na poseé kunuku, lo kual ta eksigí hopi katibu pa mano di obra, miéntras ku hudiunan tabata mas den komersio i nabegashon, aktividatnan ku no tabata rekerí tantu katibu.

En bista di tur esaki nos mes ter dedusí ku hudiunan a bini Kòrsou práktikamente sin rekurso i ku ta aki nan a traha, lucha i spar pa yega na e posishon ekonómiko importante ku nan a bin ta okupá den añanan despues.