You are here

18. Kontribushon Na Formashon Di Lenga Papiamentu

  • Sharebar

No ta kabe duda ku e komunidat hudiu di Kòrsou ku su abla portugues i ku, manera ya nos a menshoná, tabata konstituí mas di mitar di e poblashon blanku di nos isla na fin di siglo 18, a ehersé un influensha grandi den formashon di papiamentu i a enrikesé nos lenga ku hopi palabra i ekspreshon derivá di portugues i di abraiko. No mester lubidá ku te na aña 1875 Rabino Aaron Mendes Chumaceiro, tata di e sélebre abogado Abraham Mendes Chumaceiro, tabata prek na portugues den Snoa. Igualmente ta probá ku huntu ku e lenga portugues e hudiunan di Kòrsou for di siglo 18 tabata paria papiamentu entre nan mes tambe. Prueba ta e sélebre 'karta di amor' skirbí dor di un hudiu di Kòrsou na su amante na aña 1775. Ta mashá di lamentá ku no opstante tur esfuerso ha sí di parti di tan tu miembronan di komunidat hudiu komo di nos lingwistanan di papiamentu te ainda nos no por a dal ku e original di e karta. Nos konos'é únikamente di un fotografia den e obra di Dr. Isaac i Suzanne A. Emmanuel, History Of The Jews Of The Netherlands Antilles. Den kuestion di influensha di hudiunan riba formashon di papiamentu e obra resientemente publiká di May Henriquez, Ta Asina? O Ta Asana? ta iluminá e aspekto aki di un moda kabal.