You are here

19. Kòrsou Su Papel Den Region Na Siglo 18

  • Sharebar

Komersio i nabegashon a alkansá un di su piknan den nos istoria durante guera di independensha di Merka rònt di aña 1776. Kasnan komersial di St. Eustatius - di kua hopi tabata den man di hudiu sefardita - i di Kòrsou tabata suministrá hopi di e material di guera ku e ehérsitonan di George Washington tabatin mester den nan lucha pa independensha kontra inglesnan. E prosperidat ku St. Eustatius a alkansá asina ei a dun'é nòmber di 'The Golden Rock òf the Caribbean'. Inglesnan no a lubidá. Na aña 1781 nan a manda nan Atmiral Rodney St. Eustatius pa kastigá e isla. El a sakea i kima hopi di e depósitonan na e bahia i den Oranjestad. Despues el a plama e poblashon hudiu over di un serie di islanan ingles den Karibe pa asina kibra nan forsa kolektivo. Pero kabamentu di e bum di St.Eustatius a keda será algun aña promé: ku fin di e guera na Merka su importansha komo un sentro di trasborde, di tráfiko i di almasenahe di material i merkansia destiná pa Merka a stila i kaba. E snoa impresionante ku hudiunan sefardita a traha den Synagogue Alley, yamá Honem Dalim (=Miserikordioso ku Pobernan), awor no ta mas ku un ruina den estado deplorabel kla pa basha abou. Preservashon di e monumento istóriko aki ta un prioridat di gran urgensha. E sementerio ku su 22 tumbanan, algun di nan hopi similar na esnan den Beth Haim di Kòrsou, ta den un estado pasable te ainda.

Mas serka di kas, den e aktual Venezuela, e anhelo pa independensha a kuminsá manifestá su mes rònt di kambio di siglo diesnuebe. Komo bisiña mas serkano e movementu ei a envolvé Kòrsou indirektamente tambe. No solamente entrega di arma, munishon i otro material di guera pa e ehérsito di Simón Bolívar tabata pasa Kòrsou, pero nos habitantenan tambe a duna apoyo personal na e Libertador di gran parti di Sur Amerika. Pedro Luis Brion a buta tur su barkunan i su fortuna personal konsiderabel na sirbishi di Bolívar. Pa su méritonan Bolívar a nombra Brion Gran Almirante de Gran Colombia, manera den inisio di revolushon e teritorio di Venezuela i Colombia huntu tabata rama. Otro yu di Kòrsou, Manuel Carel Piar, tabata un di Bolívar su generalnan di plas eksitoso i e konkistador di hinter Guayana. Pero tambe dos hudiu sefardita di Kòrsou a distinguí nan mes den e guera di liberashon aki: Koronel Isaac de Sola i Kapitan di Kabayeria Benjamin Henriquez. Bolívar a risibí ayuda material i moral di e afamado abogado hudiu di Kòrsou, Mordechay Ricardo. Esaki a duna Bolívar refugio ora ku na 1812 e mester a hui for di Venezuela. Tambe Mordechay Ricardo a asumí e kuido di Bolívar su dos ruman muhénan, na ken el a duna uzo di un kas di dje situá kantu di laman na Pen, mihor konosí komo 'Oktagon' pa su forma kurioso di 8 banda. Awendía Oktagon ta un museo Bolivariano. John de Pool a relatá e episodio aki den su buki 'El primer chispazo de genio', resientemente editá i publiká pa Dr. L.W. Statius van Eps i EIsita Luckmann-Levy Maduro bou di e título Bolívar En Curazao.