You are here

2. Origen Di E Prome Hudiunan Kurasoleño

  • Sharebar

En realidat nan istoria a kuminsá hopi siglo promé na Spaña i Portugal. For di 800 aña promé ku Era Komun tabatin hudiu bibá na Spaña. Na siglo XII di Era Komun nan a yega tòp di nan envolvimentu den bida spañó, produsiendo filósofonan manera Maimonides, Nahmanides, poetanan manera Ibn Gabirol i Yehuda Halevi, i estadistanan manera Samuel Levi di Toledo, Isaac Abravanel i Abraham Senior. E Siglo di Oro ei a topa ku un fin abrupto na 1492 ora ku e reinan spañó, Fernando i Isabel, selebrando nan viktoria riba moronan i nan unifikashon di Spaña bou di un solo korona, a dekretá ku tur hudiu i mohamedano mester konbertí inmediatamente na katolisismo òf salí for di tur tera spañó.

E gran mayoria a salí for di Spaña bai haña refugio na teranan bou di dominio di sultannan otoman di Turkia, ku a akohé nan i duna nan protekshon i libertat pa ehersé nan religion. Esei tabata prinsipalmente na Salonika, Istanbul i henter norte di Afrika. Tambe algun stat italiano manera Livorno, Venezia, i algun mas chikí, a ekstendé un invitashon pa hudiunan spañó bin establesé den nan stat.