You are here

20. Firmanan Grandi Lantá Na Prinsipio Di Siglo 19

  • Sharebar

Promé mitar di siglo diesnuebe a weta e lantamentu di algun firma hudiu grandi ku tabata praktiká no solamente komersio, pero tambe nabegashon, industria i aktividatnan finansiero internashonal. Nos por hasi menshon espesial di e firmanan: A.J. Jesurun & Co., ±1800, S.E.L. Maduro & Sons na 1837, Edwards, Henriquez & Co. na 1856, Correa Hermanos & Co., ±1850, M.E. Curiel & Sons, ±1840, i Jacob de Jeosuah Naar, ±1820.Dos di nan a yega di emití nan mes moneda, un stùiver di plata, nan tabata Jesurun & Co. i J.J. Naar. Na 1893 S.E.L. Maduro & Sons a emití plaka di papel ku a sirkulá te na 1901 ora ku pa lei Curaçaosche Bank, ku pokopoko a bin desaroyá komo nos banko sentral, a enkargá su mes ku tur emishon di plaka. For di algun di e firmanan menshoná aki a nanse ku tempu 3 banko komersial lokal: Maduro' s Bank, Curiel' s Bank i Edwards, Henriquez & Co.'s Bank. Na 1932 e dos proménan a djòin otro formando e aktual Maduro & Curiel's Bank, ku a bira e banko mas grandi di Antias Hulandes. E ta situá na e plaga ku ta karga nòmber di un di su fundadornan i su promé direktor-gerente, Jojo Correa. E di tres banko, despues di un kresementu eksitoso, a ser bendé ku AIgemene Bank Nederland/Hollandsche Bank Unie na aña 1968.

Na aña 1863 un kombinashon di firma hudiu ku S.E.L. Maduro na kabes a gana e kontrat pa tumba e murayanan di Willemstad. Komo pago nan a haña e terenonan ku a bira liber dor di e derumbe i tambe e kosta di Laman Chikí (Waaigat) ku nan por a dèmpel ku e material di e murayanan. Asina a ser kreá Prinsenstraat i De Ruyterkade. Un parti di esun promé a ser nombrá Madurostraat, dia ku e firma S.E.L. Maduro & Sons a selebrá su 125 aña di eksistensha, miéntras ku un parti di De Ruyterkade a haña nòmber di Sha Capriles Kade, na memoria di e popular finado direktor-gerente di Maduro & Curiel' s Bank, I.H. (Sha) Capriles. Esei a sosodé na okashon di e 65 aniversario di fundashon di e banko.