You are here

21. Fundashon Di Kongresashon Liberal Israelita 'Emanu-El'

  • Sharebar

Den seno di e kongregashon Mikve Israel tabata biba ya pa basta aña e deseo di un partí di e miembresia pa introdusí algun liberalisashon i modernisashon den rito religioso di e kongregashon. Esaki tabata en pugna ku opinion di tantu e Rabino komo e Direktiva di e tempu ei. E konflikto di prinsipio aki a krea shèrtu polarisashon entre e famianan ku tabata konstituí e kongregashon. Na mes tempu e kompetensha entre firmanan hudiu grandi pa gana e kontrat pa tumba muraya di stat tabata turnando lugar i, kasualmente òf no, e famianan ku tabata na fabor di mas liberalisashon den rito, prinsipalmente famianan Jesurun i Cohen Henriquez, a bin haña nan konfrontá den esfera komersial ku e famianan konservador di kua Maduro tabata e vosero prinsipal. E choke di posishonnan aki i e intransigensha di Rabino i Direktiva pa trese algun kambio den e rito a kaba na resultá den un divishon den ter di e kongregashon. Finalmente na 1864 komo un tersera partí di e kongregashon original a separá i a forma nan mes kongregashon riba prinsipionan liberal di Reform Jewish Movement ku e tempu ei tabata ha siendo un impakto den hudaismo na Alemania i Merka. E kongregashon liberal nobo a haña nòmber di Kongregashon Liberal Israelita Emanu-el (Dios ku Nos). Den poko tempu nan a konstruí un tèmpel imponente na Hendrikplein, konosí komo Tèmpel Emanuel, i un sementerio separá na Berg Altena. Eksaktamente 100 aña despues e dos kongregashonnan a bin haña otro atrobe i huntu nan a forma e Kongregashon Uní Portugues Israelita Mikve Israel Emanu-el.

Komo rito religioso e kongregashon uní a skohe esun di Reconstructionist Federation òf America, un rito ku ta posishoná mas o ménos entre ortodoksismo i reformismo i ku tabata ofresé márgen pa preservá algun di e kustumbernan istóriko i tradishonal di ámbos kongregashon. A akordá ku tur servisio lo turna lugar den e istóriko i antiguo snoa Mikve Israel. E edifisio di Tèmpel Emanuel lo a stòp di eksistí komo un kas di Dios i lo a ser destiná pa finnan kultural. Na aña 1989 el a ser bendé ku un empresa privá ku kier buta un restorant di klase den e edifisio.