You are here

22. Kontribushon Di Hudiunan Den Komersio, Industria, Turismo I Kousanan Sosial Di Kòrsou

  • Sharebar

Na 1829 i despues atrobe na 1883 Gobièrnu di Kòrsou a instituí un Kámara di Komersio i Industria. Su promé 3 presidentenan elehí tabata tur for di e grupo di hudiunan sefardita di Kòrsou: Jesurun, Penha i Cohen Henriquez. Di e 17 presidentenan ku Kámara a konosé den su promé 100 aña di eksistensha 7 tabata hudiu. Komersiantenan hudiu tabata den vanguardia tambe den fundashon, operashon i presidensha di Vereniging voor Handel en Industrie, awendia yamá Vereniging Bedrijfsleven Curacao. Den tempu mas resiente nan tabata igualmente aktivo den lantamentu di Curacao Action Group ku a yuda duna e stot pa reaktivá turismo i tambe e sentro di Punda.

Aparte di nan kontribushon gran di na ekonomia di Kòrsou den kampo komersial, hudiunan sefardita a emprendé tambe algun proyekto den área industrial. E merkado doméstiko chikí i e falta di materia prima naturalmente tabata semper un opstákulo pa un mayor desaroyo di e aktividat ekonómiko aki. E industria di mas antiguo ku nos ta topa kuné ta esun di traha sneif. Un tempu tabatin no ménos ku 8 fábrika di sneif, tur di hudiu, riba nos isla. For di promé ku 1734 i durante mas di un siglo tabatin un mulina di bientu pa mula hariña di maishi chiki na e plaga ku despues a haña su nòmber, Pla Mulina òf Molenplein. E mulina tabata propiedat di un firma ku tabatin dos sosio, unu hudiu pa 2/3 partí i unu protestant pa 1/3 partí. Konstrukshon di barku tambe tabata un industria kaminda hudiunan a partisipá aktivamente. E promé tankero pa trasportá petroli di Lago di Maracaibo pa Kòrsou a ser konstruí na 1916 dor di Maduronan riba nan astiyero na Motet pa kuenta i órden di Bataafsche Petroleum Maatschapij (e prekursor di Shell Curacao). Ku atvenimentu di bapornan di stal e industria ei a bin muri un morto natural. Espesialmente Jesurunnan i Maduronan tabata doñonan importante di waf. Na entrada di siglo 20 S.E.L. Maduro & Sons a kumpra e konseshon i instalashonnan pa produsí elektrisidat i distribushon di awa di fundador di e dos empresenan ei, kònsùl merikano Leonard B. Smith. Tambe S.E.L. Maduro & Sons tabatin un fábrika di eis na Rif.

Haim Cohen Henriquez, pa hopi aña Presidente di Kámara di Komersio i Industria i alabes Postdirektur skibi, ta fundador di e promé skol pa siña nos hendenan flèktu sombré di kabana. El a lant'é na 1906 i e tabata situá bou di su kas di biba na Pietermaai # 8. Otro produktonan produsí dor di hudiunan di Kòrsou tabata: e likor di Kòrsou outentiko trahá for di e kaska seku di laraha, tambe pan, sigaria, spaguèti, sapatu, habon, chukulati i mangel, paña di bis ti, i den tempu resiente: ferf, kosmétika, kolonia mentolá, lechi prosesá, eiskrim, cola i limonada. Ta bon pa memorá aki tambe ku Parke Wilhelmina tabata un inisiativa di un Klup di Dama hudiu, 'Entre Nous', ku bou di presidensha di Srta. Rebecca Cohen Henriquez a transformá na aña 1899 e antiguo tereno bashí, Fo'i Porta, den e bunita alameda ku nos konosé awe. Den ramo di turismo nan a desplegá gran aktividat, no solamente den e asina yamá 'shopping tourism' den kua nan pakusnan di turismo a hasi un trabou pionero' den añanan '30, i a kontribuí na duna nos isla fama internashonal komo un puerto preferí pa kruseronan di turismo, pero tambe den e 'stay-over tourism industry' nan a partisipá i inisiá hopi proyekto. Por ehèmpel hudiu di Kòrsou tabata den e vanguardia di promoshon pa konstrukshon di Hotel Plaza (originalmente Hotel Curaçao Intercontinental), di Hotel Curaçao Caribbean (ántes Curaçao Hilton), di Trupial Inn (ántes Country Inn), di Las Palmas (ántes Arthur Frommer), i nan tabata sosio den e prekursor di tur otro hotèl na Kòrsou den siglo XX: Hotel Americano na Plaga Brion. Den tempu kontemporáneo un hudiu di Kòrsou a kolaborá grandemente ku e esfuersonan komun pa logra realisashon di nos International Trade Center (I.T.C) i di establesimentu di hotèlnan di luho Sonesta i Ramada Renaissance. Den e brènch di restorant tambe nan a trese nos isla hopi nòmber internashonalmente konosí.

Den esfera síviko i karitativo komunidat hudiu semper a sabi di duna un mano Pa duna algun ehèmpel: Stichting Prinses Wilhelmina Fonds (P.W.F) voor Kankerbestrijding, Prinses Beatrix Fonds voor Tuberculose patienten, Sosiedat pa Kuido di Diabétiko (Sokudi), Wijkverpleging 'Curaçao', tur a ser lantá i pa hopi aña dirigí pa miembronan di komunidat hudiu. Stichting Jeugdzorg pa aña largu por a konta ku partisipashon i liderasgo di integrantenan di e mésun gremio aki. Igualmente nan tabata aktivo den un serie di fundashon sosial/ekonómiko ku a ser lantá den último dékadanan i for di kua a bin resultá entre otro: Banko di Desaroyo, Fundashon Obra di Man, Fundashon Empresa Chiki, Fundashon Seguridat Sosial.

Den e kampo karitativo e mes fundashonnan ku den siglo 18 a ser lantá pa yuda hudiu pober ku tabata yega aki for di Amsterdam, despues a sigui eksistí pero dunando sosten prinsipalmente na menesterosonan di otro gremionan di nos isla.

Nan tabata entre e hendenan di promé ora den establesimentu di Klupnan di Servisio manera Rotary, Lions, Innerwheel i Soroptimists, i nan a sigui aktivo den nan te awor. Den deporte nan a destaká den tènis i a lanta Curaçaosche Sport Club (C.S.C.). Un miembro di komunidat hudiu a dediká un gran partí di su bida na promové e deporte di futbòl tantu riba nos isla komo internashonalmente komo vise-presidente di F.I.F.A. Hudiunan di Kòrsou, posiblemente komo resultado di nan estadia di 20 siglo komo parti integral di un kultura ku promé tabata islamita i despues katóliko na Spaña i Portugal, semper a tene nan na e tradishon di no lanta un sosiedat no-religioso di kua su miembresia ta reservá únikamente pa hudiu so: nan a perkurá semper pa e miembresia ta abrí i ta inkluí representantenan di tur religion. Den esfera kultural un hudiu a lantá e promé teater di Kòrsou, Teatro Naar, i nan a sigui e liña ei ku establesimentu di vários sine/ teater. Nan a komponé muzik di Kòrsou i a laga hopi bunita wals di Kòrsou atras pa nos. Durante di dos guera mundial komunidat hudiu di Kòrsou a lanta Joods Hulp Comite ku a hasi un gran trabou humanitario. E komité aki tabata intermediá pa refugiadonan hudiu ku a keda sin patria, ora ku ehérsitonan nazi a okupá nan pais i kuminsá deportá tur hudiu pa kamponan di konsentrashon i eksterminashon, drenta Kòrsou sea pa tan ten òf pa fast, i tabata para garantia pa nan.

Den añanan sesenta nan a intermediá eksitosamente pa duna refugio temporal na Kòrsou na hudiunan ku tabata hui for di e Cuba di Fidel Castro, te ora ku nan por a haña visa pa drenta otro pais den nos region. E mes institushon aki a sigui presta su apoyo material te dia djawe pa yuda mehorá e kondishonnan di vivienda di e kantidat di imigrantenan hudiu ku a sali for di insertidumbre di nan pais natal i skohe pa bai biba na Estado di Israel.