You are here

24. Hudiu Di Kòrsou Den Profeshonnan

  • Sharebar

Den profeshonnan hudiunan di Kòrsou a distinguí nan entre otro komo dòkter. E promé dòkter sivil di nos isla tabata Dr. Ysaac Gomes Casseres (1690), mashá konosí tabata Dr. David Ricardo Capriles (1837-1902) na ken su memoria Dr. Capriles Kliniek a ser yamá. E manshon na Penstraat ku awor ta sede di Hubentud 70, tabata kas di un dòkter mashá stima: Dr. Haim Abraham de Casseres. Awendia nos por konta ku sigur un 4 dòkter hudiu riba nos isla. Den abogasia nos mester menshoná Mordechay Ricardo, e gran protektor di Simón Bolívar, i Abraham Mendes Chumaceiro Az. ku a bira sélebre den nos istoria komo un di e promé luchadornan pa introdukshon di elekshon demokrátiko pa nos Parlamento i tambe komo oponente ferviente di e idea di bende Kòrsou ku Venezuela.

E kantidat di botikario, outor, poeta, doña di libreria i periodista hudiu ta muchu hopi pa inkluí den e istoria kòrtiku aki. Nos por hasi un eksepshon pa Mauricio Namias de Crasto, David Dario Salas, Emilio Lopez Henriquez, Moses Michael Pinedo. Den ramo sientífiko/kultural Biblioteka Mongui Maduro na Roi Katochi, ku ta kontené loke S.A.L. Maduro a kolekshoná durante su bida na publikashonnan ku karakter antiyano i/ òf hudaiko meresé un menshon espesial. E biblioteka valioso aki, nombrá na su memoria, ta ser mantené i ekstendé kontinuamente dor di un Fundashon ku tin su yu muhé na kabes. Hopi trabou di investigashon i eskrutinio archival i genealógiko. a ser hasí durante promé mitar di e siglo aki pa Jossy M. Levy Maduro, ku a buta nan tur na disposishon di e istoriador di hudiunan di Kòrsou, Dr. Isaac Emmanuel menshoná anteriormente.