You are here

25. Partisipashon Den Gobièrnu I Mundu Akadémiko

  • Sharebar

For di tempu di West Indische Compagnie puestonan den gobernashon kolonial tabata okupá kasi eksklusivamente pa representantenan di e gremio protestant. Pero despues di e emansipashon legal di hudiunan na aña 1825, - promé ku esei tabata prohibí pa nombra un hudiu den Gobièrnu Of ni sikiera komo ámtenar -, nos ta kuminsá haña vários hudiu den sektor públiko. Ya na 1844 nos ta topa algun hudiu nombrá den konseho kolonial. Dr. Sol Cohen Henriquez tabata Prokurador General i Gobernador Interino i den e kapasidat ei tabatin e honor di inougurá Koningin Emmabrug na 1888. Den añanan despues kuater a bin sirbi komo Ministro, promé den College van AIgemeen Bestuur despues den Gabinete di Minister. Hopi tabata miembro i algun biaha Presidente di Koloniale Raad. Despues dos otro a bira miembro elegí di Staten i pa algun tempu tabata su Presidente. Unu a bin okupá e puesto di Prokurador General, miéntras ku dos otro tabata Adjudant di Gobernador. Vários di nan a sirbi komo miembro di Raad van Bestuur ku despues a bira Raad van Advies, meskos di AIgemene Rekenkamer i komo direktor di Banko Sentral.

Den mundu akadémiko nos por konta ku por lo ménos 5 hudiu di Kòrsou ku a alkansá puesto di Profesor na un Universidat: na Groningen, Utrecht, Columbia University di New York, Harvard University na Cambridge i Universidat di Caracas. Otro a sirbi komo e promé dekano di e Fakultat Sosio/Ekonómiko di Universidat Nashonal di Antiyas i tambe pa basta aña komo lektor den ekonomia na dicho universidat. Un hudiu di Kòrsou ku den su tempu tabata hopi den notisha tabata Daniel de Leon. Na aña 1900 e tabata na kabes di e lucha pa derechonan di obreronan na New York, e tabata ko-fundador di Socialist Labor Party di Merka i pa hopi aña redaktor en hefe di nan korant, The New York Daily People.