You are here

26. Imigrashon I Emigrashon Hudiu Den Siglo 20

  • Sharebar

Rònt di kambio di siglo situashon ekonómiko general na Kòrsou tabata basta malu. Hudiunan hóben i emprendedor ya no por a haña oportunidat di trabou riba nos isla pa krea un bon futuro pa nan i nan famia. Komo konsekuensha hopi di nan e emigrá bai purba nan suerte den paisnan nobo den nos region, manera Colombia, Venezuela, Panamá, San Salvador, Santo Domingo i durante e bum di suku di kaña espesialmente Cuba. E gran mayoria a bin asimilá totalmente den ter di e poblashon di e nashonnan ei i a kasa ku yunan di tera. Komo resultado por lo general nan yunan no a lanta den religion hudiu. Te dia di awe nos por topa ku mashá tantu nòmber di famia kristian den e paisnan di nos region ku ta enditu esnan di hudiunan di Kòrsou i ku den hopi kaso ta rekonosé ku orguyo nan desendensha sefardita di hudiunan di Kòrsou.

Na prinsipio di siglo 20 imigrantenan hudiu sefardita for di Medio Oriente a bin establesé riba nos isla. Nan a ser inkorporá den Kongregashon Mikve Israel,i a partisipá aktivamente den bida komersial, espesialmente den e ramo di detal i turismo.

Di aña 1926 en adelante hudiunan di Oropa Oriental, (e.o. Polonia, Rusia, Rumania), perseguí den pogromnan i oprimí den nan aktividat, a bin buska i haña un refugio sigur i ku libertat garantisá riba nos isla. Nan a dediká nan na e negoshi di de tal, espesialmente den ramo di paña di bisti. Ku e kresementu di nos poblashon den e añanan ei komo resultado di establesimentu di Shell riba Kòrsou, nan pakusnan popular di detal a bin yena un bashí den nos struktura ekonómiko. Den ramo di hoyeria Spritzer i su sosio Fuhrmann a krea un kadena di pakus di hoyeria di alto nivel ku a duna nos isla un fama berdaderamente universal i ku a konstituí un gran empuhe na nos industria turístiko. E grupo di hudiu askenazi aki (Askenazi ta nòmber di e ramo di hudiu proveniente di Oropa Oriental, miéntras ku Sefardita ta esnan proveniente di Spaña, Portugal i área di Mediteráneo), a lanta nan mes sinagoga pa asina por a preservá nan rito askenazi i a yam'é 'Shaarei Tsedek' (Porta di Rektitut). E tabata situá na Scharloo # 37, aktualmente un ofisina di akountant. Awor e sinagoga ta ubiká na Lelieweg 1A.