You are here

5. Refugio, Libertat I Prosperidat Na Hulanda

  • Sharebar

Den e mésun époka ei Hulanda tabata ganando su guera di independensha for di Spaña, un guera hibá den kuadro di e lucha ku tabata turnando lugá den Norte di Oropa entre protestantismo i katolisismo romano. Komo konsekuensha di su lucha pa libertat di religion Hulanda tabata ofresé refugio na tur víktima di persekushon katóliko.

Poko poko hudiunan sekreto di Portugal a haña e kaminda pa bai Hulanda, espesialmente Amsterdam kaminda nan a bin establesé e istóriko Sinagoga portugues/hulandes. E komunidat ei pronto a bin desaroyá komo e sentro mas destaká, mas riku, i mas importante di hudaismo Oropeo.

Su desaroyo i kresementu rápido, danki tambe na yegada di kada bes mas koreligionario for di Spaña i Portugal, a kontribuí grandemente pa hasi Amsterdam e sentro prinsipal di Oropa den ramo di komersio, nabegashon, finansa i aseguro. I ta for di e fuente vibrante ei e gran mayoria di hudiunan di Kòrsou a bini.