You are here

6. E Prome Establesimentu Na Kòrsou Na Aña 1651 i Fundashon Di Kongregashon Mikve Israel

  • Sharebar

Na 1648 Hulanda ku Spaña a sera e tratado di pas di Münster i komo konsekuensha Kòrsou a bin pèrdè su utilidat pa Hulanda pa sirbi komo un base naval for di unda nan por a hostigá e flotanan i kolonianan Spañó den área di Karibe. Hulanda a konsiderá seriamente pa bandoná Kòrsou.

Pero komo un último rekurso West lndische Compagnie (WIC) a disidí di weta si no tin interes di partí di siudadano hulandes pa bin establesé kolonianan agríkola na Kòrsou. Nan a laga sa ku nan ta duna tera, libertat di impuesto, protekshon i otro sorto di insentivo na kualke grupo ku kier hasi uzo di e oferta ei.

Na 1651 un grupo bou di patronato di un tal Joao d' Yllan, un hudiu hulandes di e kongregashon 'portugues' di Amsterdam, a apliká pa un konseshon. D'Yllan tabatin eksperiensha den trópiko komo kolono na Brazil hulandes. Manera ta konosí Hulanda a yega di konkistá nort di Brazil di portuguesnan na aña 1630. Hulanda a desaroyá e teritorio ei intensivamente, espesialmente ku kultivo di kaña di suku, pero na 1654 el a bin pèrd'é atrobe na Portugal.

D'Yllan a ofresé di trese 50 kolonista, pero na final a logra rekrutá solamente 10 pa 12 famia, mayoria di nan for di su propio komunidat hudiu di Amsterdam. WIC a dun'é un tereno na partí nort di Schottegat ku tabata situá mas o ménos meimei di e aktual refineria di petroli. Nan a duna nan kunuku e nòmber 'De Hoop' ku ta kuadra ku e nòmber ku nan a duna e kongregashon religioso ku nan a funda na e mes tempu: Mikve Israel ku ta abraiko pa 'Speransa di Israel'. D'Yllan i su grupo no a kobra mashá éksito den agrikultura. Algun di nan te asta a pidi Dirèktùr di WIC pa permití nan regresá Hulanda.