You are here

7. E Segundo Grupo Di 1659

  • Sharebar

Na 1659 un segundo grupo di hudiu Portugues proveniente di Amsterdam, un total di 70 hende bou di patronato di un lsaac da Costa a pidi i haña un konseshon similar di WIC. Hopi di nan tabata eks-kolono di Brazil hulandes ku a evakuá e pais ei huntu ku Hulandesnan dia ku Portugal a rekonkistá nort di Brazil for di Hulanda na 1654.

West lndische Compagnie a duna nan e kunuku De Hoop i nan a haña tambe terenonan adishonal, awendia konosí bou di nòmber di Rio Canario, Rozentak, Gasparito, Valentijn, Marchena, Habaai.

Nan lider lsaac da Costa tabata un miembro fiel di e sinagoga di Amsterdam, ku den nan abla Portugues nan tabata yama 'esnoge'. Dia nan a barka pa Kòrsou e Esnoge a duna nan un Sefer Torá, e ròl di perkamento lorá riba dos bara di palu konteniendo e 5 bukinan di Moisés (Génesis, Eksodo, Number, Levítiko i Deuteronomio). Pa servisio religioso hudiu e ta práktikamente indispensabel, ya ku e lèsnan ku nos por siña for di Torá, su mandamentunan étiko i moral, i e kreensha firme den unidat di un solo Ser Supremo, ta e sènter rònt di kua religion hudiu ta konsentrá.

E Sefer Torá ei ta konstituí esun promé ku a yega nos isla. Te dia djawe e ta un di e 18 sefer toranan na uzo den sinagoga Mikve lsrael-Emanuel.