You are here

8. Establesimentu Di Sementerio Beth Haim

  • Sharebar

Na e mes aña di nan yegada na Kòrsou e segundo grupo aki a establesé i konsagrá un sementerio ku nan a yama Beth Haim (Kas di Bida). E ta e sementerio hudiu di mas antiguo den hinter hemisferio oksidental. E ta kontené 2,500 tumba, hopi di nan enrikesé ku bunita eskultura den marmer representando esenanan bíbliko ku tin shèrtu relashon ku e nòmber di e difuntu. Por ehèmpel tumba di un hende ku nòmber Jacob ta mustra e pasahe for di Beibel di e soño di Jacob kaminda angelnan ta subí i baha un trapi ku ta yega te na shelu. Un ku e nòmber di Salomon ta mustra e famoso veredikto di e sabio Rei Salomon na momento ku pa medio di su sentensha e ta deskubrí kua ta e berdadero mama di un infante resien nasí, ku dos mama ku a duna lus den anochi i di kua un su yu a nase morto, tabata bringa p' e. Hopi graf tin komo eskultura un barku di bela , pa rekordá ku e difuntu tabata doña òf kapitan di barku. Un ruman muhé di e sélebre filósofo hudiu/hulandes, Baruch de Spinoza, ta derá serka nos. En kuanto e idiomanan uzá riba e lápidanan 1668 tin inskripshon na portugues, 112 na abraiko, 433 na spañó, 89 na ingles, 32 na hulandes, 3 na franses, unu na 'yiddish', i ningun na zjudeo-español (hopi biaha eróneamente yamá ladino). Nan ansienidat, arte i balor istóriko ta hasi e sementerio aki na Blenheim (originalmente Bly en Heim) un monumento ku un importansha berdaderamente internashonal i transedental i un di e atrakshonnan turístiko mas grandi di nos isla. Ta duele di weta kan aña tras aña mas i mas inskripshon ta bai pèrdí dor di eroshon kousá pa e ásido sulfúriko den huma di refineria.