You are here

9. Kuminsamentu Di Komersio Na Kòrsou

  • Sharebar

E segundo grupo di kolonista hudiu tampoko no a logra hasi agrikultura un aktividat ekonómiko viable. E yobida skars di nos isla, e añanan di sekía, e bien tu fuerte i e solo kayente a kombiná pa fòrsa e kolonistanan buska otro medio di bida riba nos pida baranka. Pronto nan a bin deskubrí ku e kolonianan spañó na Kosta Firme (e aktual Venezuela i Colombia) tabata mashá mal atendí pa nan Madre Patria. Tabata sosodé ku den hinter un aña un solo barku ku provishon i material tabata yega pa nan for di Spaña. Konsiente di e nesesidat ei e kolonia hudiu di Kòrsou a inisiá un tráfiko komersial kontinuo ku nan, importando merkansia manufakturá na Oropa pa bende ku nan i kumprando nan produkshon agríkola (suku, tabaku, kakou, katuna i speserei) pa eksportá pa e merkadonan riku di Amsterdam, Bordeaux, Londres i Hamburg. Pa ehersé e aktividat aki na un moda optimal e kolonistanan a bin establesé den Willemstad den ter di protekshon di su murayanan fortifiká. Nos ta topa ku ya na 1660 un tal Jeosuah Henriquez tabata doña di dos kas den Punda, den e aktual Windstraat - ku segun shèrtu indikashon tabata rama Jodenstraat den siglonan pasá.