You are here

1. Deskubrimentu Di Boneiru

  • Sharebar

Boneiru a ser deskubrí na aña 1499, probablemente den e promé siman di luna di sèptèmber.

Komo deskubridó di Boneiru ta pará notá Amerigo Vespucci. Sinembargo ta tene kuenta ku Alonso de Ojeda tambe por tabata den e ekspedishon ei, anke no ta sigur.

Alonso de Ojeda i Amerigo Vespucci a sali huntu for di Spaña, pero den Karibe nan a parti for di otro. No ta konosí ku esaki a sosodé promé òf despues ku a deskubrí Boneiru.

Echo ta ku Vespucci tabata sí e promé persona ku a duna un deskripshon di Boneiru. Ela hasi esaki den un karta ku ela skirbi na aña 1504 na su amigu Pierro de Tomasso.

Deskripshon ku Vespucci a duna di e Indjannan ku ela topa na Boneiru: "Nan parse bestia brutu, boka yen di yerba bèrdè i di baina nan por a papia. Nan tabata karga dos kalbas: unu yená ku e yerba/blachinan i e otro yená ku un puiru blanku. Nan tabata muha un pida palu ku skupi i despues tabata hink'é den e kalbas ku puiru i despues pone e palu na nan boka. Ora nan a mira nos, nan a kana bini den nos direkshon".

E Spañónan ta pidi e Indjannan awa di bebe. E Indjannan ta kontestá ku no tin awa. Sí e Indjannan a ofresé nan e blachi ku nan tabata kou, loke a pone Vespucci asumí ku nan lo tabata kou e blachinan aki kontra set.

Intenshonalmente e Indjannan no a duna e Spañónan awa. E Spañónan a keda 1 1/2 dia riba e isla.

Segun Vespucci, e Indjannan di Boneiru no tabatin nada di kome. Solamente piská. Nan no tabata planta mashá.

Algun otro punto interesante ku Vespucci a opservá:

  • Muhénan no tabata kou blachi;
  • Indjannan tabata kolektá awa pa bebe for di sirena ku tabata kai anochi riba blachinan di palu;
  • Nan no tabatin kas; sí ranchonan di palu kubrí ku blachi;

Vespucci tabata desapuntá den Boneiru, pasobra no tabatin oro riba e isla aki.

Ta kalkulá ku e Spañónan a subí tera na e sitio unda Playa ta situá; bahia di Kralendijk.

Despues di Vespucci e Spañónan a sigui bishitá Boneiru i a tuma e isla komo propiedat òf kolonia di Spaña.

E tipo di Indjan ku Vespucci a topa kuné tabata di e tribu Kaiketio di e famia lingwístiko Aroako. Ta kalkulá ku hopi aña promé ku Vespucci a deskubrí Boneiru e Indjannan aki a pobla e isla di Boneiru, biniendo for di tera firme di Sur Amérika.

Investigashonnan arkeológiko a indiká ku for di 3.000 pa 7.000 aña pasá tabatin Indjan kaba na Boneiru. A haña artefaktonan di piedra ku segun investigashon ta asina bieu.

E artefaktonan aki tabata hopi similar ku artefaktonan hañá na kosta di Venezuela. N an tabata trahá hopi bia di piedranan ku no ta den naturalesa boneriano. E Indjannan aki tabatin hopi kontakto ku kanoa entre Boneiru i Venezuela. Masomenos 15 pa 25 hende por a bai den un di e kanoanan aki.
Na momentu di deskubrimentu ta kalkulá ku tabatin 600 indjan bibá na Boneiru. Lo mester tabatin masomenos 12 pueblo indjan.

Nan kuminda tabata piská, yuka i maishi.

Spañónan, anke nan a konkistá Boneiru, no a establesé permanentemente riba e isla aki. Nan a keda bai i bini.

Algun aña importante den tempu spañó:

1511: Alonso de Ojeda ta haña enkargo pa kolonisá rònt di Lago di Maracaibo, pero no inkluí e islanan aki. Esaki ta habri kaminda pa yag riba e Indjannan di Boneiru pa usa nan komo katibu. Spañónan tabatin mester di hende pa traha den minanan di koper na Española.

1513: Diego Salazar ta haña enkargo pa kue tur Indjan hiba Española, loke a sosodé tambe. No a logra kue tur. Tin un par a skonde i despues hui bai Venezuela. Juan de Ampues, ku a bira Faktor Real na Española, a sòru pa trese partí di e Indjannan aki bek Boneiru. Pero nunka e mésun kantidat no a bini bek.

Despues di e periodo spaño ta bini e époka hulandes. Na aña 1636 e Hulandesnan ta okupá Boneiru definitivamente i nan ta konbertí e isla aki den un plantashi operá pa West Indische Compagnie (WIC).

Despues di algun aña turbulento alrededor di aña 1800, Boneiru ta bira un plantashi di Gobièrnu di Hulanda.

Tantu den e époka di WIC komo den e periodo ku Boneiru tabata kai direktamente bou di Hulanda, te na momentu ku a abolí esklabitut na aña 1863, tabatin katibu na Boneiru.

Un punto importante ta ku, kontrario na Kòrsou, na Boneiru no tabata permití pa partikularnan establesé i eksplotá plantashi. Tòg por nota ku algun partikular a haña pèrmit spesial pa hasi esaki, di manera ku tòg Boneiru tabatin algun shon.