You are here

10. Prokurador Di Rèi Ta Bini Boneiru

  • Sharebar

Djamars dia 18 di novèmber 1834 anochi, 8 dia despues ku e .u insidentenan a kuminsá na Rincon, Prokurador di Rei ta yega Boneiru ku e barku Eensgezind, kapitaniá pa H.I.F van Grieken. Eensgezind, huntu ku e golètnan Abeona, Gijsbertha i Gertruida tabata e barkunan ku tabata mantené kontakto mas tantu den e époka ei entre Boneiru i Kòrsou. E kapitannan di Gijsbertha i Gertruida kasi tur bia tabata respektívamente C.B. Debrot i un tal Matthias Levy.

Na momento ku Eensgezind a drenta haf di Boneiru e anochi di djamars 18 di novèmber tabatin na bordo, aparte di Prokurador di Rei, M.C.C. Römer, tambe dos supagente polisial.

Komandùr Schotborgh ta hasi anotashon di yegada di Eensgezind den su diario. E ta menshoná tambe ku ela risibí algun karta di gezaghebber òf direktor di Kòrsou, entre otro tokante transakshon di e katibu Bellefaas Martien.

E enkargo ku Prokurador di Rei M.C.C. Römer a haña di gezaghebber di Kòrsou pa investigá loke tabata pasando na Boneiru. E meta tabata pa pone e katibunan rebelde kumpli bek ku nan deber i alabes bolbe na obediente, sin ku e mester a buska refugio den medionan di preshon.

E òrdu na prokurador di rei sinembargo tabata kla tambe den kaso ku e no por a logra resolvé e problema den forma pasífiko. Si e resistensia mester a kontinuá, prokurador di rei mester a sòru e ora pa usa medionan di preshon òf te asta violensia pa yama e katibunan na òrdu Luego e lo mester a laga transportá e katibunan rebelde (" de belhamels") pa Kòrsou. Prokurador di Rei Römer tabatin pues outorisashon total pa aktua disiplinariamente kontra e katibunan rebelde.

Un punto importante tambe di e prokurador di rei tabata pa investigá te kon leu e habitantenan liber di Rincon a instigá e katibunan pa asumí nan aktitut rebelde. Prokurador di rei tabatin òrdu pa tuma medida eventualmente tambe kontra e residentenan liber ei di Rincon.

Ta asina ku Komandùr Schotborgh semper tabatin basta problema ku e habitantenan liber di Rincon. E hendenan aki konstantemente tabata enbolbí den ladronisia di kabritunan di gobièrnu.

Na momentu ku asina yamá "Commissie der Districtmeesters en Ambtenaren" a reuní riba e situashon di e katibunan, i ku a disidí ku lo hür un barku pa hiba e notisia Kòrsou pa gezaghebber, a bai tambe un petishon pa haña arma, munishon i ekipo relashoná ku esakinan. E komishon a spesifiká tambe ki arma i munishon mester a pidi.

Na bordo di e barku Eensgezind a bini loke a pidi. A haña 25 skopèt, 25 tas di bala i nan faha spesial, 12 sabel, 200 bala, 200 piedra di kandela i algun otro asesorio.

E siguiente dia mainta tempran a baha e lote di arma, munishon i asesorionan aki for di e barku Eensgezind.

Riba enkargo di Prokurador di Rei/Römer e Jagtmeester den servisio di gobièrnu, kompañá pa un di e supagentenan polisial ku a bini for di Kòrsou, a salí direkshon di Rincon pa notifiká e katibunan ku na mester a akudí na fòrti.

E katibunan a obedesé e òrdu aki i tra'i mèrdia a yega Playa. Pero nan no a drenta fòrti. Nan a keda pará na un distansia i a laga prokurador di rei sa ku t' e mester bini serka nan. Prokurador di rei sinembargo no a aseptá e invitashon aki i a para riba ku ta nan mester drenta fòrti.

Aki henter e rebeldia ku a tuma lugá, i ku a mantené Boneiru durante un siman den tenshon, ta kaba den un forma pasífiko. E katibunan, despues di papia ku prokurador di rei, ta disidí di reanudá trabou. Prokurador di rei a imponé kastigu riba esnan mas brutal entre e katibunan i a manda nan pa bai traba e siguiente dia, loke a sosodé tambe. Probablemente Martis tambe tabata den e katibunan ku a haña kastigu, mirando e ròl ku ela hunga.

Riba dia 20 di novèmber 1834 mainta tempran enbèrdat por nota ku e katibunan a kuminsá traba bek den e kunuku pariba di gobièrnu. Algun di e katibunan aki a keda enkargá tambe ku trabou di transportashon na Saliña. Nan mester a transportá salu for di e saliñanan pa un di e sitionan na unda barku tabata ankra pa kue salu.

Djasabra 22 di novèmber por turna nota ku e situashon a práktikamente normalisá. Ta partí rantsun, pero por nota ku ainda Schotborgh no a haña responsabel pa inkluí ròm den e rantsun semanal.

E mésun dia ei anochi Prokurador di Rei ta sali bek pa Kòrsou. E ta hiba huntu kuné tambe un karta den Komandùr Schotborgh pa Gezaghebber di Kòrsou pa inform'é di e último desaroyonan relashoná ku e rebeldia di e katibunan.

E siguiente siman komandùr ta sigui ku su aktividatnan rutinario. Asina por nota ku e ta hasi un bishita di inspekshon na hospital djamars 25 di novèmber.

Ku e mésun barku Eensgezind, ku ta regresá Boneiru dia 26 di novèmber, Schotborgh ta haña un karta di Gezaghebber di Kòrsou, den kua e ta duna aprobashon i elogio pa e forma kan ela atendé henter e situashon ku a surgi.

Djasabra dia 29 di novèmber 1834 Schotborgh ta inkluí atrobe ròm den rantsun semanal di e katibunan. Nan ta haña 15 kana di ròm.