You are here

11. Loke A Pasa Despues

  • Sharebar

Den e añanan ku e lantamentu a tuma lugá tabatin na Boneiru masomenos 450 katibu di rei. E katibunan di shon tabata masomenos 167.

Pa loke ta trata e hendenan liber ("vrijlieden"), por a konta e tempu ei masomenos 1.100. Tabata tantu eks-katibunan, hendenan di koló òf di orígen indjan.

E insidente di novèmber aña 1834 tabatin konsekuensia pa e katibunan di rei. Gobièrnu a haña su mes fòrsá pa tuma medida, konsiderando ku tabatin e impreshon ku hendenan liber a hunga un ròl importante, instigando e katibunan pa lanta i resistí.

Ademas tabata tene kuenta ku e hendenan liber aki, debí na nan situashon, tabata harta hopi bia kabritu den e kuránan di gobièrnu. I nan tabata instigá e katibunan pa hasi meskos.

Komandùr Claas Schotborgh ta menshoná den su diario na algun okashon ku ladronisianan di kabritu ta oumentando i ku e ta sospechá e hendenan liber di tabata kometé e echonan aki.

Despues di e lantamentu di novèmber 1834 tabatin e problemanan tambe ku e katibu Bentura na aña 1835. E hendenan liber na Rincon a yuda Bentura durante e dianan ku ela hui. Tabata dun'é kuminda i awa, miéntras ku tabata yud'é skonde pa outoridat.

Relashoná ku e lantamentu di 1834, Schotborgh den un karta pa Gezaghebber van Raders di Kòrsou ta puntra su mes te kon leu e hendenan I liber di Rincon a instigá e katibunan pa a komportá nan mes manera a I sosodé den e siman di 10 di novèmber 1834.

No mashá tempu despues di e lantamentu den kunuku di gobièrnu i e kaso di Bentura, Gezaghebber van Raders ta bini ku un plan di evakuashon di e hendenan liber for di Rincon.

Tantu di partí gobièrnu komo di lidernan spiritual a kuminsá hasi intento pa konbensé e hendenan liber aki pa bandoná Rincon i bin biba mas pegá ku siudat, pero sin resultado.

Un momentu dado, pa medio di dekreto gubernamental fechá 31 di yanüari 1850, a ordená e famianan di hende liber (45) pa bandoná Rincon. Dia 14 di febrüari di e aña ei e 45 kabesnan di famia mes ter a akudí na Fòrti, na kas di komandùr, ku a informá nan di e desishon ku a kai.

Tabata komandùr Jan Schotborgh Claaszoon, yu di komandùr Claas Schotborgh, ku mester a atendé e asuntu aki. Claas mes a muri dia 21 di mart 1840. Su yu a bira komandùr na su lugá.

E hendenan liber aki a oponé na promé instante, mustrando ku tempu di kosecha tabata yegando, loke a pone Jan Schotborgh konsultá ku Gezaghebber Johan Rammelman EIsevier jr. na Kòrsou, ku a bai di akuerdo pa posponé ehekushon di e desishon te despues ku kaba kosechá. Pero en todo kaso na luna di mei kada kabes di famia mester a duna di konosé na unda nan kier a bai biba. Vários di nan a skohe pa bai biba den e bario konosí komo Den Tera (Antriol).

Masomenos den e mésun tempu ei tambe gobièrnu a disidí pa trasladá un parti grandi di e katibunan pa un otro área di residensia. Na ougùstùs 1850 e desishon pa e mudansa aki a ser tumá. E region na unda e katibunan aki a bai biba a bin haña e nòmber di Mundu Nobo, un nòmber ku a keda mantené su mes na bida te den na kuminsamentu di siglo 20 aña, despues di kua ela bira Tera Kòrá.

Dia 8 di ougùstùs 1862 ta bini un lei konteniendo abolishon di esklabitut entrante 1 di yüli 1863. Dia 7 di òktober 1862 a anunsiá e lei aki.

E liberashon di katibunan a bai sin mashá problema. 151 Katibu partikular i 607 katibu di gobièrnu a optené nan libertat na 1863.

Tabatin algun festividat riba e dia di emansipashon. E katibunan a kanta: Libertat, libertat, libertat. Grasias na Dios su boluntat, nos a haña libertat.