You are here

2. Esklabitut Na Boneiru

  • Sharebar

Realidat ta ku na momentu ku bo papia ku e Boneriano tokante su orígen òf desendensia, e ta referí mayoria bes solamente na e Indjannan ku a biba riba e isla aki hopi aña pasá. Remarkabel ta ku kasi nunka e Boneriano ta hasi referensia na su orígen afrikano, esta e katibunan afrikano ku a traba i biba riba e isla aki. Tòg ta un realidat ku e ingrediente aki ta bon visibel den e poblashon boneriano.

Esklabitut di hende pretu den region di Karibe a hasi su entrada na momentu ku na Europa a disidí ku e indjannan ku tabata habitá e kontinente Amérika no tabata adekuá pa hasi trabou di katibu. Despues di debatenan teológiko ekstenso, kontrario na e Neguer, e Indjan a keda rekonosé komo hende. No solamente rasonnan humanista ta aklará e eskoho pa katibunan afrikano. E Indjannan tabata menasá ku eksterminashon komo konsekuensia di trabou fòrsá, asesinato di pueblonan indjan i . enfermedatnan europeo, kontra kua nan no tabata resistente.

Banda di esaki tabata suponé ku e katibunan afrikano, debí na vários faktor, tabatin e bentaha ku no mester a teme ku nan lo a rebeldiá.

Boneiru tambe dado momentu a baña riba su suela katibunan afrikano. Esaki ta sosodé despues ku Hulanda a okupá e isla aki na aña 1636. No muchu aña despues e promé katibunan afrikano ta yega Boneiru pa traba den eksplotashon di salu i tambe den e plantashinan di gobièrnu. Tin un lista di 1639 kaba riba kua tin poné e kantidat di katibunan afrikano ku mester a haña rantsun - kuminda i paña.

Masomenos 60 aña despues di e yegada di Hulandesnan na Boneiru tabatin 97 katibu. Na Kòrsou tabatin e tempu ei 1.000 i na Aruba ningun katibu afrikano. E sifranan aki di kantidat di katibu ta ilustrá na mes momentu e importansia ekonómiko di e tres islanan aki: Boneiru tabata ekonómikamente mihó posishoná ku Aruba.

Anke no tin mashá sifra disponibel, por nota ku na 1697 tabatin na Boneiru 97 katibu, na 1699 137 katibu, na 1721 220 i asina e kantidat a sigui subí. Na 1806 tabatin na Boneiru 364 katibu riba un poblashon di 945 habitante. Den e promé periodo ei Boneiru tabata bou di maneho di West Indische Compagnie (WIC). Pa ta mas eksakto: Boneiru tabata un plantashi di WlC. Remarkabel ta ku den e periodo ei Boneiru hopi bia tabata blanko di piratanan ku tabata invadí e isla aki pa kometé aktonan di ladronisia. Dokumentonan ta mustra ku te asta katibu nan tabata bin harta. Entre otro esaki ta salí na kla den e reglanan ku e komandùr di Boneiru mester a apliká, na momentu ku barkunan sospechoso tabata den serkania di e isla. E mester a duna òrdu mesora pa tur katibu stòp di traba i pa bai skonde nan den mondi.

E katibunan di Boneiru tabata komportá nan mes hopi trankil. No tabatin reakshon na Boneiru riba e rebelionnan di katibu ku tabatin na Kòrsou na añanan 1750 i prinsipalmente esun di 1795. Esaki ta algu straño si tene kuenta ku Boneiru tabata ser konsiderá den e époka ei komo un isla na unda nan tabata deportá katibunan problemátiko pa bin sinta nan kastigu. Tabata trata di e asina yamá "katibunan di kadena", ku tabata hasi nan trabou mará na kadena.

Probablemente nan lo no a manda tòg katibunan hopi rebelde Boneiru, kisas pa miedu pa nan no bai instigá e katibunan riba e isla aki pa nan tambe rebeldiá. No mester lubidá ku e sòldánan ku tabatin pa mantené òrdu no tabata representá mashá kos tampoko.

Aparte di e katibunan di gobièrnu, yamá katibu di rei, tabatin tambe na Boneiru loke nan tabata yama katibu di shon òf katibu di barkadó, pero esakinan tabata na un kantidat súmamente limitá, kompará ku Kòrsou, na unda sí tabatin un kantidat grandi di katibu di shon. Masomenos un kuart di e poblashon di katibu na Boneiru tabata katibu di shon.

West Indische Compagnie no tabata permití pa personanan partikular establesé na Boneiru. Tòg tabatin algun eksepshon. Esnan ku tabata ser permití pa establesé i hasi algu di negoshi hopi bes tabata famia di komandùrnan òf di empleadonan haltu. Tabata na fin di siglo 18 ku ta kuminsá duna pèrmit pa personanan partikular establesé. I e hendenan aki tambe tabatin katibu.

Amtenarnan di gobièrnu tambe, komo kompensashon, por a disponé di katibu pa hasi trabou pa nan na kas. Gobièrnu tabata bisti i alimentá e katibunan aki pa nan. E katibunan muhé poné na disposishon di e amtenarnan aki pa hasi trabou di kas tabata baña nan mes enbolbí hopi bia den relashonnan amoroso ku e amtenarnan aki, loke tabata kondusí na situashonnan inaseptabel.

Pokopoko por a nota tambe ku a kuminsá eksistí un grupo di hende pretu liber na Boneiru. Tabata trata aki di e katibunan ku tabata kumpra nan libertat òf hendenan ku tabata kumpra nan libertat pa nan. Asina bo ta topa por ehèmpel ku Pastor Basilio di Playa a yega di kumpra libertat di sierto katibunan.

Mas bieu i mankaron e katibunan aki tabata, mas ménos nan balor riba merkado tabata bira.

E katibunan ei sinembargo, kontrario na e katibunan di Kòrsou, no tabata kompletamente liber. Nan mester a hasi sierto servisionan pa WIC ("herendiensten"). Pa e servisionan èkstra aki nan tabata baña rantsun meskos ku e katibunan i na momento di hasi trabou èkstra nan tabata risibí tambe algun glas di ròm. E areglo aki tabata konta tambe pa e Indjannan ku tabata biba riba e isla.

Si nan no oponé pa kumpli ku e servisionan aki, tabata rekonosé silensiosamente nan establesimentu riba e isla komo hende liber. Ta opvio ku nan no tabata oponé.

Den siglo 19 por a konsiderá ku kondishon di e katibunan di gobièrnu na Boneiru no tabata mas malu ku e situashon di trahadónan den fábrika na Europa. Mester tene kuenta ku e katibunan aki tabata un propiedat i pues tabata representá kapital. E doño tabata sòru pa nan den forma rasonabel. E trato no tabata asina malu.

Djadomingu i otro dianan di fiesta tabata dia liber, igualmente djasabra tra'i mèrdia. Esaki tabata konta tambe pa e katibunan di shon. Tabatin reglamentunan ku mester a tene kuenta kuné pa loke ta trata trato di e katibunan aki.

No opstante e bon trato aki, e katibunan di Boneiru no tabatin bon nòmber. Den un rapòrt di poblashon di 1806 tin poné: "E poblashon katibu di Boneiru ta floho i nan ta duna mashá poko servisio i nan ta hopi dañá, debí na muchu libertat i maneho malu".

Ta interesante pa menshoná tambe ku e katibunan no tabatin derecho di kontraé matrimonio sivil na Boneiru, pero na 1828 a kuminsá permití nan pa kasa ku otro i desde 1844 tambe ku otro hende, pero solamente na misa.

Tokante e trabou ku e katibunan mester a hasi ta asina ku nan tabata traha tantu den e saliñanan di salu komo den e plantashinan di gobièrnu. E trabou den saliña tabata sosodé den e temporada ku e salu tabata kristalisá i na momentu ku mester a karga e barkunan ku tabata bin buska salu. Sobrá di tempu nan tabata hasi trabou di kunuku.

E trabou den saliñanan di salu tabata sosodé anochi i tambe mainta. Mèrdia i tra'i mèrdia tabata muchu duru pa nan a hasi e trabou aki. Entre otro nan wowonan tabata ser afektá pa e solo ku tabata reflehá den e salu kristalisá. Nan tabata baña sosiegu di 12'or pa 3'or i di 3'or pa 4'or solamente por a traba riba teritorio seku, pues no den e saliñanan mes.

Na Saliña tabatin un lots grandi den kua e katibunan por a drumi. Tambe. tabatin un renbak na nan disposishon. Nan mes tabata traba tambe ranchonan den kua nan tabata permanesé durante e siman ei na Saliña. Te den añanan sinkuenta di e siglo aki (20) ainda restu di e ranchonan aki tabat'ei. Pastor Nooyen durante su investigashonnan a mira e restunan aki.

Na 1850 gezaghebber Jan Schotborg a proponé pa traba e loke nos konosé awendia komo kasnan di katibu pa e hendenan aki. Pero nan no tabata mas ku un lugá den kua e katibunan por a sosegá i pasa anochi. Nan kasnan mes tabata na Rincon i despues Tera Kòrá.

E katibunan mes ter a kana djadumingu for di Rincon, na unda nan tabata biba, bai e saliñanan parti sùit di Boneiru. Djasabra nan tabata regresá nan kas.

Masomenos na aña 1850 ta disidí pa trasladá e bibienda di un parti grandi di e katibunan aki di Rincon pa e área konosí awendia komo Tera Kòrá. Esaki tabata pa evitá e kaminata di 6 pa 7 ora di i pa e saliñanan di salu. Mas bien sinembargo motibunan ekonómiko, i no sosial, a kondusí na e desishon aki. For di nan bario nobo nan por a yega e saliñanan mas lihé, loke ta en será ku nan por a produsí mas. E bario ei a baña e nòmber di Pueblo Nobo òf Mundu Nobo. Riba un mapa di 1907 ainda e nòmber Mundu Nobo ta aparesé.

E katibunan aki opviamente no tabata mashá kontentu ku e mudansa aki, konsiderando ku e oranan ku tabata spar pa kana pa nan sitio di trabou, a bira oranan di trabou den e saliñanan. Moralmente tambe e mudansa aki no tabatin un influensia faborabel riba nan, konsiderando ku esaki a kibra nan lasonan familiar i amistoso na Rincon.

E katibunan di plantashi na 1824, segun reglamentu di katibu, mester a baña sosiegu entre 12' or pa 2' or di mèrdia.

Un katibu hòmber tabatin derecho riba seis kana di maishi pa siman i un muhé katibu sinku kana. Na sierto okashon e katibunan di rei tabata risibí karni di baka i tur siman un sierto kantidat di ròm i kòfi.

Kontrario na Kòrsou, e katibunan na Boneiru no tabata risibí nan kuminda òf rantsun riba djarason (dia di rantsun), pero riba djasabra. Esaki tabata e dia ku e katibunan tabata regresá nan kas na Rincon i Tera Kòrá (despues di 1850).

Originalmente e katibunan hòmber tabata risibí un bes i e katibunan muhé dos bes pa aña tela di osnabruk, un tela gròf i fuerte, pa kose nan pañanan. Despues, enbes di duna nan tela, tabata duna nan e paña di trabou kla kosé kaba.

Tabatin kontròl fuerte tambe riba e parti higiéniko di e katibunan. Tabata duna nan puiru di karbon pa limpia nan karni di d djente i mannan dos bes pa dia. Tur djaluna tabata kontrolá nan piedranan di mula maishi i weanan den kua tabata kushiná.

Na momentu ku nan bira malu tambe e katibunan aki por a konta riba asistensia liber di e dòkter di gobièrnu ("landschirurgijn"). E dòkter aki mester a kontrolá tambe si e katibunan ku tin bes tabata mèldu malu, tabata enfermo di bèrdat. Mèldumentu mal u tabata sosodé hopi.