You are here

3. Lucha Pa Derecho Di Katibunan

  • Sharebar

Un persona ku a lucha hopi pa logra un trato aseptabel i humano pa e katibunan di Boneiru tabata pastor i prefekto apostóliko di Kòrsou Niewindt. Den e tempu promé ku ela bira obispu, Niewindt a bringa pa e pobernan di e islanan aki i spesialmente pa e katibunan.

Un punto ku a haña hopi atenshon e tempu di Niewindt tabata enseñansa i informashon, ku bista riba abolishon di esklabitut. Enseñansa i informashon ta lanta tambe deseo pa libertat i mas libertat. P' esei Niewindt no a purba di haña abolishon di esklabitut sin nada mas, esta sin e katibunan haña chèns pa siña algu i asina gana nan pan di kada dia.

E promé preokupashon di Niewindt tabata skol i enseñansa pa e katibunan. Na mes momentu Niewindt tabata bringa tambe pa haña mas derecho pa e katibunan ku tabata katóliko, entre otro e derecho pa kasa.

Na aña 1828 Niewindt a logra ku gobièrnu a duna pèrmit pa un hòmber liber kasa ku un mucha muhé katibu den misa. Pa gobièrnu e no por a kasa. E mésun aña Niewindt a pidi gobièrnu pa duna Boneiru un skol, sin logra nada.

Na aña 1844 Niewindt a laga e pastor di Boneiru sa ku for di awor dos hende ku ta katibu por a kasa ku otro pa misa. Gobièrnu ta duna e pèrmit, ma gobièrnu sí no ta kasa nan.

Na aña 1850 Niewindt a purba un bia mas di haña un skol pa Boneiru. Gobièrnu a kontestá ku tin skol kaba na Boneiru. Pero esaki tabata un skol pa e empleadonan di gobièrnu, un skol pues pa protestantnan.

E mésun aña Niewindt a bolbe dirigí un petishon na gobièrnu pa un skol pa e muchanan katóliko i pober, bou di direkshon di sùrnan. Na luna di desèmber 1851 e pèrmit pa skol ta bini. Na aña 1852 Niewindt a duna pèrmit na Pastor Basilio na Boneiru pa traha un pastorí nobo banda di misa di Playa, di manera ku e pastorí bieu por a sirbi komo skol i kas di sùrnan.

Niewindt a skirbi tambe un karta pa mr. G.Z.A. Zuylen, miembro di Staten van Holland, tokante e situashon di katibunan na Boneiru. E karta aki ta fechá 1 di desèmber 1852.

Den karta aki Niewindt ta mustra ku tin entre 500 pa 600 katibu (1852) na Boneiru. Ta bèrdat ku awor nan ta baña un tiki mas kuminda (maishi seku sin nada mas) i un poko mas paña di hilu (osnabruk) pa bisti na nan kurpa, kompará ku e katibunan partikular. Ma katibunan di gobièrnu, hòmber i muhé, tambe muchanan riba 12 aña di edat, mester traba den saliñanan di salu for di djaluna mainta te djasabra atardi, for di mardugá te bahada di solo, ku eksepshon di un ora mèrdia.

"Teribel e trabou aki ta den kayente di solo i ku pia 'bou den pekel skerpi di e saliñanan. Anochi nan ta drumi aya banda mes, bou di shelu habrí òf bou di poko rama. Nan no por troka nan paña ku ta muhá di pekel. Hende por komprondé ku esaki ta mashá malu pa salú i ta duna tambe okashon pa inmoralidat, komo ku e famianan no ta keda semper huntu ku otro, ma , nan ta plamá riba e diferente lugánan", Niewindt ta skirbi den e karta dirigí na mr. Zuylen.

E ta sigui mustra: "Djasabra atardi nan ta bolbe bai na e pueblo ku ta tres ora leu pa nan tuma nan rantsun di maishi. Djadomingu kasi nan no por bai misa, komo ku nan mester bolbe bai e saliñanan. Di e manera aki no por tin oportunidat pa enseñansa. Pastor ta pasa hopi molèster pa prepará algun mucha pa Promé Santa Komunion".

"Tin mas!" Asina Niewindt ta skirbi. "Kada unu ku ta yamá empleado di gobièrnu na Boneiru tin por lo ménos un katibu muhé pa sirbi' é. Lástima ta kustumber ku e pobersitonan ta víktima di e sensualistanan ku nan mester sirbi. I ademas, kuantu mucha muhé ku tabata komportá nan mes bon i ku tabata religioso, ta ser fòrsá den tur sentido di palabra pa hasi malu. Ai esun ku riska protestá. Ta duru pa mi mester skirbi asina, ma mi ta kere ku ta mi deber, a fin ku un bos generoso lanta den sala di gobièrnu na fabor di e pobernan aki i defendé e kousa di e parti oprimí aki di humanidat. Esaki no ta un bèrgwensa pa nos gobièrnu? E no mester duna un ehèmpel di generosidat na e otronan i duna libertat na e katibunan Òf, a lo ménos, sivilisá nan i trata nan mas mihó ku e otronan ta hasi?"

Niewindt mas aleu den e karta dirigí na Zuylen ta trese dilanti ku e ta konsiente ku mester hasi trabou den e saliñanan di salu. E ta sugerí pa na lugá di usa e katibunan, laga gobièrnu hür hende liber, manera sa sosodé tambe ántes. E sueldo ta hopi abou tòg.

Te asta Niewindt ta sugerí kiko gobièrnu por paga hendenan liber pa traba den e saliñanan: un homber ta baña 50 sèn pa día, un muhé 40 sèn pa día i un mucha 20 sèn pa día.

"Hende liber no ta traba si e no ta sinti su mes muchu han, ni tampoko lo e permití ku su kasá i su yunan ta hasi trabou ku ta muchu pisá pa nan òf ku ta daña nan salú. Ma e pober katibu, ke òf no ke, ta ser fòrsá, e ta mira su kasá i su yunan changá ku zuip, sukumbí bou di su trabou i e no tin mag di bisa nada", segun Niewindt.

Tabatin diferente katibu ku a laga nan stèmpel atras na un manera òf otro. Un di nan tabata Martis di Katalina Janga, ku tabata enbolbí den un lantamentu na aña 1834, ku ta forma esensia di e buki aki.

Un otro katibu ku a laga su stèmpel atras tabatin e nòmber Bentura. Na Rincon te ainda tin un tanki ku ta karga e nòmber di Tanki Bentura, probablemente esaki tin di aber ku e katibu ei, ku a biba den e área di Rincon.

Un dia Bentura a logra hui. Komandùr Claas Schotborgh tabata sospechá ku otro katibu i tambe katibunan ku a baña nan libertat ("vrijlieden") tabata yuda Bentura. Ela kuminsá menasá esnan ku yuda Bentura ku e lo laga basha nan kas abou Pero e gezaghebber di Kòrsou a prohibi'é di hasi esaki. Mas bien mester trese esnan ku hasi algu asina dilanti hues.

Finalmente nan a logra kapturá Bentura tòg i a ser' é den prison na Fort Oranje. Dia 14 di yüni 1835 sinembargo e ta logra hui. Ela koba un buraku bou di muraya i a kana salí Fort Oranje trankil asina di dje bai kas.

Ta kalkulá ku e tempu ei a duna e tanki i pos pa nort di Rincon nòmber di Bentura, pa asina duna honor n' é. E otro katibunan i esnan liber tabata konsider'é komo un héroe. Ta opvio ku e nòmber aki a salí for di e katibunan mes i esnan ku a baña nan libertat.

Un otro katibu ku su nòmber a keda tras ta Eleutheria Ana de Palm, nasé dia 18 di aprel 1833 na Boneiru. Libertat di e katibu muhé aki a ser kumprá pa Pader Basilio, na unda ela traba despues komo kriá. E dama aki a bira e promé sur boneriano. Dia 13 di yanüari 1856 ela drenta e òrden di Sùrnan di Rozendaal bou di e nòmber religioso di Sur Marie Lucie. Ela muri dia 26 di ougùstùs 1916.

Despues di dje tabatin mas katibu ku a haña òf kumpra nan libertat i ku a bira sùr. Un di nan tabata Geertruida Martis. Ela drenta e òrden di Sùrnan di Breda bou di e nòmber di Sùr Maria Elizabeth.

Tabatin tambe un katibu muhé, Aldersina, ku su nòmber ta bini dilanti den historia boneriano. Gobièrnu na aña 1849 ta usa e suma di 300 florin, ku tabata e preis pa kua a kumpra libertat di e katibu aki, pa konstrukshon di un skol públiko ("landschool") na Boneiru.