You are here

5. E Shonnan Di Boneiru

  • Sharebar

Na Boneiru, anke no na un kantidat grandi manera na Kòrsou, tabatin tambe katibunan di shon. Tabata trata aki di katibunan partikular. E motibu ku na Boneiru no tabatin hopi katibu di shon tabata debí na e echo ku no tabata pèrmití den e tempu di West Indische Compagnie pa partikularnan establesé na Boneiru. Na fin fin siglo 18 sinembargo ta kuminsá bini kambio den esaki, na momentu ku por nota ku ta duna pèrmit pa personanan partikular kuminsá establesé riba e isla, pero bou di kondishon i reglanan severo.

West Indische Compagnie (WIC) na Kòrsou inisialmente tabata konsentrá mas tantu riba nan negoshi di katibu. Nan tabata importá e katibunan aki for di Afrika na Kòrsou. Den poko tempu WIC a transformá Kòrsou den un haf di tránsito, kaminda tabata desembarká merkansia for di Europa i Afrika i barka merkansia for di e kontinente merikano i Karibe pa Europa. Na aña 1648 e poder komersial i militar di e komersiantenan di WIC a bira asina grandi ku Spaña a rekonosé Hulanda komo un estado independiente. Ta despues di e aña ei, negoshi di katibu a bai hunga e papel di mas importante den e aktividat komersial di WIC i Kòrsou a keda konbertí den un sentro di kompra i benta di katibu.

Den e di dos mitar di siglo 17, WIC tabatin asta hegemonia den e negoshi ei. T' esei a yuda entre otro pa siglo 17 bira e siglo di oro pa Hulanda. Si na aña 1675 WIC tabata importá masomenos 3.500 katibu pa aña, sifranan ta papia di 20.000 katibu na aña 1685.

Den e di dos mitar di siglo 17, pokopoko e promé kontingente di sòldá i matros a amplia ku amtenar, komersiante i katibu.

Segun Hulandesnan ta sigurá nan posishon den Karibe i negoshi di katibu ta floresé, plantashinan a kuminsá plama rònt Kòrsou. No ku e meta pa produsí kuminda pa e miles di katibunan di tránsito ku tabata warda pa WIC haña bende pa nan. Pa kumpli ku esaki, un kantidat di katibu afrikano a bin haña Kòrsou komo destino.

Segun kálkulo, na 1700 tabatin alrededor di 1500 katibu tabata biba i traba riba plantashinan di WIC na Kòrsou. Aña 1700 tabata e aña tambe ku e negoshi di katibu di e Hulandesnan a yega su punto kulminante.

Na Boneiru tabatin un situashon kaminda no tabata permití pa hendenan partikular establesé. Sinembargo na fin di siglo 18 ta kuminsá bini kambio pokopoko den esaki, pa despues den siglo 19, despues di tempu ingles, mas hende a kuminsá establesé nan mes riba e isla.

E hendenan ku tabata permití pa establesé den e tempu di West Indische Compagnie na Boneiru tabata mará na sierto reglanan ku nan mester a ten e nan mes n' e. Entre otro pa loke ta trata kantidat di bestia ku nan por a kria i asina tabatin mas regla. Pues no tabatin empresa liber.

Pastor Nooyen a profundisá basta den e e hendenan ku sí a haña pèrmit pa establesé na Boneiru den pasado. Por a konsiderá e hendenan aki e poko shonnan ku tabatin na Boneiru.

Algun di e promé famianan na Boneiru, ku por a ser kontá entre e shonnan di e isla, tabata famia Boekhoudt, Hart, Hachet, Semeleer, Thielman i algun otro.

Por ripará ku hopi bes e famianan aki tabatin relashon familiar ku komandùr, militar òf amtenarnan haltu di e époka ei.

Ya for di siglo 18 famia Hart tabata bibá na Boneiru. Nooyen nunka a haña un nòmber Hart komo di un famia ku tabata biba na Kòrsou den siglo 18. Despues famia Hart a bin establesé na Boneiru.

Maske ku Boneiru tabata un isla será, kiermèn ku WIC no tabata permití pa ni un hende estab1esé aki, tòg por konsiderá ku e regla aki no tabata ser apliká asina severo.

Algun di e hendenan ku a bin estab1esé na Boneiru den e segundo mitar di siglo 18, pues 200 aña pasá, tabata Laurens de Hachet (despues Haseth), Antonio Provensal, Johannes Nicolaas Provence, Thomas Offermans, Josef Faber, Elisabeth Denmark, Maria Magdalena Bulté i diferente otro mas.

Un di e famianan Boekhoudt na Boneiru tabata Jan Boekhoudt, kasá ku Dominga Petrona, un Indjan.

Aparte di personanan di desendensia hulandes òf di Kòrsou ku a bin establesé na Boneiru, tabatin tambe algun famia franses ku durante Revolushon Franses a bin establesé na Boneiru. Esaki tabata alrededor di 1800. Algun di e famianan ei tabata Rigaud, Pourier, Beaumont, Vitté, Inias i algun otro.

Un di e personanan ku a bin establesé na Boneiru tabata Nicolaas Erasmus De Jongh. E persona aki tabatin un servisio di barku entre Kòrsou, Aruba i Boneiru. Komo ku ela sirbi su tera tantu aña largu, ela haña pèrmit spesial pa establesé na Boneiru i ela lanta un kurá di bestia. E tabatin tambe katibu den su servisio.

Yato Bako tabata un kunuku formal kaminda Nene Boyé i despues su yu Christoph Boyé tabatin un kantidat di katibu ku tabata traba pa nan. Na 1863, ora ku tempu di di katibu a kaba, e katibunan aki a keda traba pa Christoph Boyé.

Nene Boyé tabatin por lo ménos 11 katibu. Durante añanan 1836 te 1856 a batisá na misa di Playa 21 katibu di Nene Boyé. Vários di nan a keda despues ku e fam Boyé òf Bough.

Tabatin un Victor Boyé, ku tabata yu di Petrona, katibu di Nene Boyé. Ela nase na aña 1840. E tabata konosí bou di e nòmber di Papa Tolly, ku a kasa ku Dominga Silberie di Nikiboko. Papa Tolly tabata kochero di Kris Boyé. Un ruman di Papa Tolly tabata William Marten Bough, nasé na 1841.

Un otro katibu di Nene Boyé tabata Christobal, yu di Agatha. Ela yega di hasi un changa ku a resultá mashá tristu. Christobal tabata limpia su skopèt i den chansa ela bisa un mucha muhé ku tabata traba na Yato Bako: "Mi ta tira bo". Christobal a kere ku su skopèt no tabata kargá. Pero ora ku ela hal' é, un bala a salí i a mata e mucha muhé. E mucha muhé tabata yama Luisa de Palm i ela bini na pos pa saka awa. Esaki a sosodé na aña 1880, despues ku a abolí esklabitut kaba.