You are here

6. Problema Den Kunuku Di Gobièrnu

  • Sharebar

Na aña 1834 tabatin un lantamentu di katibu na Boneiru tambe, anke no tabata trata di un lantamentu asina grandi manera Kòrsou. Tabata un lantamentu chikitu, pero ku tòg a lanta basta stòf. Prokurador di Rei mester a bini for di Kòrsou pa pone òrdu Tambe a pidi i haña arma i munishon èkstra.

E katibunan di Boneiru tabata komportá nan mes por lo general hopi trankil. No tabatin reakshon na Boneiru por ehèmpel riba e rebelionnan di katibu ku tabatin na Kòrsou na añanan 1750 i prinsipalmente esun di 1795, esta e lantamentu den kua Tula, Bazjan Karpata i otro katibunan a hunga un papel asina importante. Esaki ta algu straño si tene kuenta ku Boneiru tabata ser konsiderá den e époka ei komo un isla na unda nan tabata deportá katibunan problemátiko pa bin sinta nan kastigu. Tabata trata di e asina yamá "katibunan di kadena", ku tabata hasi nan trabou na kadena.

Probablemente nan lo no a manda tòg katibunan rebelde Boneiru, kisas debí na miedu pa nan no bai instigá e katibunan riba e isla aki pa nan tambe rebeldiá. No mester lubidá ku e sòldánan ku tabatin pa mantené òrdu no tabata representá mashá kos tampoko. Tabata trata di algun persona di edat avansá ku no tabata den posishon pa dominá un rebelion grandi.

Aparte di e katibunan di gobièrnu, yamá katibu di rei, tabatin tambe na Boneiru loke nan tabata yama katibu di shon òf katibu di barkadó, pero esakinan tabata na un kantidat hopi limitá, kompará ku Kòrsou, na unda sí tabatin un kantidat grandi di katibu di shon. Masomenos un kuart di e poblashon di katibu na Boneiru tabata katibu di shon.

West Indische Compagnie (WIC) no tabata permití pa personanan partikular establesé na Boneiru. Tòg tabatin algun eksepshon. Esnan ku tabata ser permití pa establesé i hasi algu di negoshi hopi bes tabata famia di komandùrnan òf di empleadonan haltu. Tabata den e segundo mitar di siglo 18 ku ta kuminsá duna pèrmit limitá pa personanan partikular establesé. I e hendenan aki tambe tabatin katibu.

E insidente òf lantamentu di mas serio ku por deskubrí den dokumentonan históriko ta esun ku a tuma lugá na 1834.

Historiadó Johan Hartog ta hasi menshon di e insidente aki den su buki "Bonaire; van Indianen tot Toeristen". Hopi atenshon sinembargo Hartog no ta duna na e lantamentu aki, ku e ta deskribí solamente komo "De rel van 1834".

Hartog ta skirbi ku dia 10 di novèmber 1834 e supervisor di katibu riba e plantashi di gobièrnu na Fontein ta konstatá ku e trabou no ta kana bon. E ta duna òrdu na su bomba pa pone preshon riba e katibunan pa traba mas duru. E trabou ta mihorá, pero tòg tin un grupo ku no ta traba manera mester la. Luego e ta sigui elaborá superfisialmente riba loke a pasa.

Hartog den su relato ta mustra ku e katibu ku a rebeldiá tabata yama Martin, pero nos a nota den e dokumentonan ku e nòmber ei no ta korekto. E nòmber eksakto ta Martis i mester apuntá ku Martis tabata un nòmber konosí den e époka ei. Hopi katibu i tambe hende liber tabatin e nòmber el.

E loke a pasa en realidat ta hopi mas ekstenso di loke Hartog a skirbi den su buki. Pa haña mas detaye mester studia e dokumentonan ku tin di aber ku e insidente aki. Na promé e diario di Komandùr Claas Schotborgh, ku tabata e persona den e funshon mas haltu na Boneiru e dia ku e insidente a tuma lugá.

Claas Schotborgh tabata komandùr di Boneiru den e periodo di 23 di mart 1827 pa 21 di mart 1840. Ela nase na Kòrsou riba dia 13 di mart 1775.

Riba e isla ei ela yega di traba komo "Districtmeester". Tambe e tabata doña di plantashi. Ela ser nombrá komo komandùr pa medio di Dekreto di Reino nr. 145, fechá 23 di mart 1827.

Claas Schotborgh a muri dia 21 di mart 1840 komo komandùr. Dia di su morto sinembargo e tabata na Kòrsou i a ser derá riba e isla ei.

E yu di Claas, Jan Schotborgh, a bira komandùr despues ku su tata a muri. Ela okupá e funshon aki di dia 24 di mart 1840 pa 1 di aprel 1854. Jan a bin Boneiru ku su tata, tempu ku esaki a bira komandùr. Jan na aña 1836 a bira supervisor di saliñanan di salu.

Pa haña un bista di loke a pasa lo ta bon pa tira un bista den e diario di Komandùr Schotborgh no solamente riba dia di e insidente, pero tambe promé ku esei. Hasiendo esaki bo ta haña un bista di kan e bida di tur dia tabata desaroyá pa e katibunan na Boneiru.

For di e diario no por ripará niun kaminda ku por a sinti ku e lantamentu aki tabata biniendo. Tur kos tabata kanando normal.

Riba dia 16 di òktober 1834 por ehèmpel nos ta ripará te asta ku komandùr, riba nan petishon, ta opsekiá e katibunan di rei un "verminkt hoornbeest". Anke ku bou di "hoornbeest" ta kai bestianan ku kachu, por asumí ku mas bien tabata trata aki di un baka i no un kabritu. Si tabata un kabritu sigur e komandùr Claas Schotborgh lo no a konsiderá pa hasi menshon di esaki den su diario.

E motibu pakiko Schotborgh a duna e katibunan e baka aki tabata komo gratifikashon pa e echo ku nan a hasi bon trabou riba kamindanan públiko. Djasabra dia 18 di òktober 1834 tabata dia di partí rantsun na e katibunan i esaki a sosodé manera normal. No tabatin niun indikashon di problema entre komandùr i e katibunan. A partí na total 95 skèp i 20 kana di maishi. Tambe a parti 16 kana di ròm.

Loke tambe por dedusí for di e diario di komandùr Claas Schotborgh ta ku for di meimei di òktober kaba e trabounan tabata turnando lugá den e asina yamá "landstuin", esta kunuku òf plantashi, na unda e lantamentu a tuma lugá.

Ta asina ku tabatin de fakto dos plantashi den e área di Rincon. Un di nan tabata situá partí pariba di Rincon, probablemente den e área di Fontein, miéntras ku esun otro tabata situá den e region ku ta konosí awor komo Washington/Slagbaai.

Aparte di e plantashinan aki, gobièrnu tabatin diferente área na unda tabata kria kabritu i baka. E áreanan aki tabata konosí komo "landskoraal". Un di e kuránan di kabritu konosí tabata keda na Santa Barbara.

Riba dia 20 di òktober 1834 komandùr Schotborgh ta nota den su diario ku e dia ei ela realisá un bishita. na e plantashi pariba i ela ripará ku e trabounan pa limpia rònt di e maishinan tabata kanando bon. No mester lubidá ku òktober ta kai den temporada di yobida i ta tempu ku ta planta maishi.

E siman ei mes, esta 22 di òktober, awaseru formal ta yobe den oranan di anochi i komandùr ta duna òrdu pa laga e katibunan kuminsá planta den e plantashi pariba aki.

Riba dia 23 di òktober tambe, segun Claas Schotborgh ta nota den su diario, tabatin yobida. E siguiente dia, ora ku tempu a klaria un tiki, ela bai bishitá e área ei atrobe pa wak kan e trabounan tabata kana. Normalmente den e temporada ei di aña, debí na e yobidanan, no tabatin mashá trabou den e saliñanan na parti suit di Boneiru. Barkunan sí tabata bin buska salu normalmente den e periodo ei.

Por ehèmpel Schotborgh ta menshoná ku den e último siman ei di òktober e promé supervisor a inform'é ku a terminá ku e trabounan pa karga e brik Henriette, bou di kapitan J.W. Downs, ku salu.

Na tur a pone na bordo di e brik aki 1576 ton di salu ku nan a saka for di e saliña yamá Pedro Kelly. Ta kalkulá ku e nòmber Peleké por a originá for di "Pedro Kelly", anke tin vershon ku Peleké ta bini di e palabra na hulandes "Pekelmeer". E montante ku mester a paga pa e salu tabata di fl.l.970,-, loke a ser pagá mesora tambe pa e kapitan.

Mester opservá aki ku e trabou pa karga e barkunan aki ku salu hopi bia tabata ser enkargá tambe na hendenan liber, manera Indjannan òf Bonerianonan di orígen afrikano ku a logra nan libertat di un òf otro forma. Nan tabata konosí komo "vrije lieden".

Komandùr Schotborgh ta remarká ku ela laga paga 13 residente di Boneiru ku tabata enbolbí den e trabou pa karga salu na bordo di e brik Henriette. Mientrastantu e komandùr ta nota riba dia 30 di òktober 1834 ku e trabounan den e "landstuin in het westen", pues e plantashi west di Rincon, pa limpia tereno pa planta, tabata kanando bon. E katibunan ku no tabata enbolbí den e trabounan di limpiesa di tereno a keda empleá pa amplia e tereno pa planta, pues pa hasi e "landstuin" mas grandi.

Aparte di limpia e tereno, eleminá mondi pa amplia e plantashi, e katibunan tabata enkargá tambe ku e trabounan pa traba un trankera rònt di e parti na unda lo a bai planta.

Luna di novèmber 1834 tambe a kuminsá den tur trankilidat. Nada ainda di indikashonnan ku lo por tabatin tenshon den e plantashinan di gobièrnu na parti nort di e isla.

Loke sí por a nota ta ku komandùr Schotborgh tabata dedikando hopi atenshon na e trabounan aki. Regularmente e tabata bishitá e teritorio aki.

Riba dia 6 di novèmber e komandùr mainta tempran, despues di pasa e komando "aan de rhee" pa un otro funshonario haltu, atrobe ta bai den e área di Rincon pa wak kan e trabounan tabata avansando na e plantashinan di gobièrnu. Komo resultado di e bishita aki komandùr Schotborgh ta instruí e supervisor di saliña, enkargá ku agrikultura, pa laga e katibunan kuminsá planta riba e tereno limpiá kaba na e plantashi parti pabou.

Tambe e ta duna instrukshon pa pone algun katibu traba riba ekspanshon di e plantashi pariba. E katibunan aki mester haña instrukshon pa kap mondi basha bou, pa asina haña mas tereno pa planta.

E dia siguiente tambe Schotborgh a pasa den e área nort di Boneiru, komo ku tabatin vários asuntu pa atendé. E kier a sigurá ku tur kos tabata kana nan, komo ku temporada di yobida a drenta i tabata importante pa planta mas tantu maishi posibel. E balor di maishi komo alimento den e époka ei tabata di vital importansia pa sobrebibensia riba e isla.

Tabata te dia 8 di novèmber numa ku Schotborgh ta regresá "De Rhee", ku tabata e nòmber di Playa òf Kralendijk den e tempu ei. E dia ei tabata djasabra i e mester a regla entrega di rantsun na e katibunan.

Mester apuntá ku na Boneiru, kontrario ku na Kòrsou, entrega di rantsun tabata sosodé riba djasabra i no djarason. Te asta ta asina ku nan ta asumí ku e palabra "djara(n)son" ta bini di e ekspreshon "dia di rantsun".

Djaluna 10 di novèmber un di e promé aktividatnan di komandùr Schotborgh tabata di bishitá hospital pa wak e katibunan enfermo. Tabata riba e dia ei ku e katibunan den e plantashi pariba di gobièrnu ta kuminsá rebeldiá. Pero tabata te e siguiente dia ku e notisia aki ta yega serka komandùr Schotborgh.