You are here

7. Lantamentu

  • Sharebar

Djamars riba dia 11 di novèmber 1834 komandùr Schotborgh ta risibí un karta di e supervisor di saliñanan di salu i tambe enkargá ku trabounan di agrikultura, den kua e funshonario aki tabata informá ku tabatin problema den "landstuin". E dia anterior mainta lo tabatin un lantamentu òf rebeldia di e katibunan ku tabata hasiendo trabou den e plantashi pariba, ku pues lo mester tabata keda den e área di Fontein.

Segun e karta aki, numerá 438, e supervisor (opzigter) a bin nota na un sierto momentu ku e trabounan no tabata kana bon. Ela paria ku e bombanan ku tabata dirigí e trabou pa pone preshon riba e katibunan pa traha mas duru ("...hen aan te drijven"). E bombanan a kumpli ku e òrdu aki i e trabounan a sigui kana den un forma mas rasonabel.

For di e dokumentonan en kestion por saka 'fo ku e tres bombanan enkargá ku supervishon di e katibunan tabata un tal Bastiaan, Elias i Nicolaas.

Mas despues e bomba Bastiaan a ripará atrobe ku e ánimo di e katibunan a kuminsá kai. Ela bin nota ku "un tropa di e katibunan" no tabata hasi ni un tiki purá pa kumpli ku nan trabou. .Esaki a pone ku Bastiaan a kuminsá pone preshon riba e katibunan. Te asta ela dal tres di e katibunan aki un sla ku kabuya.

E aktitut aki di Bastiaan a pone ku un di e katibunan, yamá Martis di Katalina Janga, "a bula salí yen di brutalidat for di e tropa". Ela bisa un chapi (i no skòp, manera Hartog a skirbi) ku e tabatin den su man, hasiendo komo sifuera e kier a dal e bomba. Na mes momentu Martis a bisa: "Gij moet mij niet slaan". Pues: "Bo no mester dal mi". Martis pues tabata un di e tres katibunan ku Bastiaan a dal ku kabuya.

Den e karta ku ela manda pa komandùr Schotborgh e supervisor ta skirbi ku na e momentu ei ela kana bai den direkshon di Martis i a ranka e chapi for di su man. Na mes momentu ela ordená Bastiaan pa dal Martis algun kabuya. Ku mashá difikultat Bastiaan a logra kumpli ku e òrdu aki, komo ku na momentu ku e bomba a tira e kabuya, Martis a kana bai. Di tur manera tin kabuya ku a kue Martis sí.

Segun e supervisor mas aleu den su relato di e insidente aki na komandùr Schotborgh, despues Martis a bai kue su chapi bek i reanudá trabou.

Martis tabata bastante indigná ku aktitut di Bastiaan i ela ekspresá esaki tambe masomenos di e siguiente forma: "Duna mi espasio, sino mi ta okashoná un aksidente". Den e karta en kestion e ekspreshon aki tabata skirbí na hulandes, ku tabata e idioma ofisial den e tempu ei.

Tambe, i aki nos ta opta pa usa e teksto original den e karta, Martis a bisa: "Het kan weinig schelen om te sterven, het is hier geen plaats om te leven. Nergens gebeurd dergelijke handelwijze".

E aktitut di Martis, den presensia di e supervisor i e otro katibunan, tabata un preokupashon grandi pa e supervisor, ku ta trese esaki tambe dilanti den e mensahe por eskrito na komandùr.

Por dedusí for di e karta aki ku no muchu tempu promé e katibu Martis aki a bini Boneiru. E supervisor ta splika komandùr den su karta ku e aktitut di Martis por influensiá e otro katibunan.

"P'esei mi a pensa ta bon pa laga un otro bomba, asistí pa un katibu, hiba Martis Fòrti (het Fort)".

Sinembargo, na momento ku e supervisor tabata bayendo kas, pa motibu ku ela kere ku e situashon a normalisá, ela bin nota ku a surgi problema pa hiba Martis Fòrti. Mester a pidi asistensia di un katibu pa yuda e bombanan.

E otro katibunan mientrastantu, mirando ki intenshon e bombanan tabatin ku Martis, a kuminsá murmurá i te asta grita ku Martis no ta bai. Bastiaan, ku parse tabata e bomba mas haltu den posishon ku e otronan, a mustra Martis ku si e no ke bai na nan, e lo laga mar'é.

E katibunan den koro a kuminsá grita atrobe, i mas duru, ku Martis no ta bai Fòrti: "Si mara Martis, anto mester mara nos tur huntu i hiba ariba (Fòrti)" .

Di akuerdo ku e supervisor den su raportahe na komandùr, komo no tabatin kapasidat pa mara tur e katibunan, ela disidí di skirbi e karta aki pa komandùr i inform'é di loke tabata pasando den "landstuin".

Mas aleu e supervisor ta informá komandùr den e karta ku e bombanan Bastiaan, Elias i Nicolaas durante ora di kome mèrdia, a tende e otro katibunan insistí ku si mester hiba Martis Fòrti, nan tambe mester bai.

E supervisor, na momento ku e bombanan a inform'é kiko tabata biba den seno di e katibunan, a bisa e bombanan pa informá e katibunan ku tra'i mèrdia lo laga kastigá Martis i e otronan ku a rebeldiá, pa asina kaba ku e asuntu.

Bek serka e supervisor e bombanan, puntrá pa kan e katibunan a reakshoná, a splika ku e katibunan a keda para riba nan punto.

E supervisor e ora ei mes ta disidí di bai serka e katibunan rebelde. E ta papia ku nan, pero ningun no ta hiba niun pia di palabra. Solamente Martis ta kontestá e supervisor, pa kolmo den un tono brutal i chèrchá. Bon kla Martis ta bisa e supervisor ku p' e ta meskos muri awe òf mañan. Tambe Martis ta splika e supervisor ku e no ta haña ku nan a hasi algu malu. I ku e bomba en kestion, esta Bastiaan, no mester a dal' é ku kabuya.

Un detaye interesante ku e supervisor ta trese na konosimentu di komandùr ta ku den e tempu ku Martis tabata na Kòrsou ya kaba e tabatin problema ku un bomba yamá Miguel. I Martis lo a laga e supervisor komprondé ku nan lo bati e bombanan di Boneiru meskos ku nan a bati Miguel.

For di e dokumentonan aki por dedusí ku a surgi un diskushon formal entre e supervisor i Martis. Martis no kier a baha kabes i a diskutí boka- boka ku e funshonario aki.

Hasiendo su investigashonnan mas aleu den e kaso aki, e supervisor a puntra e bombanan kua tabata e katibunan ku a rebeldiá huntu ku Martis. Nan a menshoná nòmber di Fransisco Martijn Koffie, Johannes di Flora Janga, Jan di Morto Regina Frans, Thomas Maria Oliana, Benito Marianna, Inancia Marianna, Fransisco Marianna, Fransisco Paula, Nicolaas Martijn di Maria Thomas, Hoze Rosaria Margarita, Pedro Sebel, Flora Janga, Martha Cathalina Janga, Cornelia Domakassé i Augustina Frans.

E lista di nòmber aki ta indiká ku no ta solamente katibunan hòmber tabata trahando den e plantashi na momento ku e problemanan a kuminsá.