You are here

8. Schotborgh Ta Drenta Akshon

  • Sharebar

Komandùr Claas Schotborgh, asina ku ela risibí e karta aki di su su pervisor, a kuminsá tuma medida. For di su diario por konkluí ku e mandatario aki semper tabata kla pa aktua. I asina tambe den e kaso spesífiko aki.

E siguiente dia, despues ku ela keda notifiká di e insidente, Claas Schotborgh ta ordená su promé i segundo supervisor, kompañá pa e "Boekhouder Klerk" di gobièrnu, pa dirigí nan mes urgentemente pa Rincon ku un mensahe kla, esta di ordená tur e katibunan pa e siguiente di a, pues 13 di novèmber, akudí na Fòrti bou di supervishon di e bombanan Bastiaan, Elias i Nicolaas.

Den oranan lat di atardi komandùr ta risibí notisia di e delegashon ku ela manda Rincon. Nan ta informá Schotborgh di a kumpli ku e òrdu ku nan a risibí. Nan a pone e katibunan na konosimentu di e òrdu di komandùr. E katibunan a skucha e mensahe aki silensiosamente. Solamente Martis a kontestá na final: "Nos a skucha!".

Riba dia 13 di novèmber komandùr, asumiendo ku e katibunan lo sigui su òrdu, ta hasi e preparashonnan nesesario pa risibí e grupo aki. Sinembargo e bombanan Bastiaan, Elias i Nicolaas ta bin notifik'é ku e katibunan a duna di konosé ku nan no ta dispuesto di bini Fòrti. Nan ta laga sa ku ta komandùr mes ter bini serka nan na Rincon.

Komandùr Schotborgh, despues di a risibí e notisia aki, ta sinti su mes den un posishon difísil i inkómodo. Esaki komo ku e no tabatin poder òf e forsa nesesario pa fòrsa e katibunan kumpli ku su òrdu pa bini Fòrti

E man yen di sòldánan na su disposishon no por a hasi mashá kos. E por a kònta riba un kuerpo boluntario tambe di residentenan liber di e isla, pero e mandatario probablemente no kier a tuma e riesgo pa provoká un konfrontashon sangriente ku e katibunan, ku tabatin hopi chèns di salí na fabor di e katibunan.

Schotborgh ta disidí di konvoká un reunion urgente ku su funshonarionan mas haltu. Ta asina ku na momento ku surgi situashonnan serio asina, e mandatario tabatin kustumber di reuní ku su funshonarionan, ku por a ser konsiderá komo su konseheronan.

"Mi kier a sa nan sintimentunan", Schotborgh a skirbi den su diario, relashoná ku e akontesimentunan di dia 13 di novèmber 1834. E komishon aki tabata ser denominá komo "Commissie der Districtmeesters en Ambtenaren" .

Schotborgh a informá e funshonarionan en kestion di e situashon ku a surgi den "landstuin" i e tabata ke sa di nan kiko nan tabata pensa ku mester a hasi. E kier a laga na nan pa disidí kua lo tabata e mihó desishon, teniendo na bista kiko tabata mas bentahoso pa gobièrnu.

E komishon a opta pa no hasi nada ainda, pero pa informá Gezaghebber/ Direktor na Kòrsou di loke tabata pasando. Mientrastantu por a laga e katibunan sigui traba riba nan mes.

Tin miembro di e komishon ku despues a argumentá ku tòg lo no ta rekomendabel pa laga e katibunan traba riba nan mes, pues sin supervishon. Mihó mantené e supervishon, sperando riba kiko Gezaghebber lo disidí despues.

Basá riba e desishon aki komandùr Schotborgh a proponé pa hür rápidamente un barku ku kua por a manda informá Gezaghebber na Kòrsou di e desaroyonan den e poblashon di katibu na Boneiru.

E miembronan di e komishon sinembargo no tabata kompartí e opinion aki. Nan tabata haña ku tòg e situashon no tabata asina serio i tenso pa gasta sèn pa hür un barku. E miembronan di e komishon a bis a ku ta mihó spera riba e próksimo barku ku tabata mantené komunikashon regular entre Boneiru i Kòrsou i ku tabata ser usá pa hiba pòst.

Un otro punto ku a bini dilanti den e reunion ei tabata un sugerensia di e komishon na komandùr Schotborgh, den sentido ku e mandatario mester solisitá serka su superiornan instrukshonnan spesífiko di kan lo mester aktua den futuro ora ku sierto situashonnan asina surgi.

Relashoná ku e reunion aki komandùr Schotborgh a outorisá (missive 160/1) e supervisor di saliña enkargá ku trabounan di agrikultura ("Opzichter der zoutpannen belast met de werkzaamheden van den landbouw") pa en espera di stipulashonnan di gobièrnu relashoná ku loke a sosodé riba dia 10 di novèmber, pa tene mas tantu posibel e katibunan bou di supervishon na trabou.