You are here

9. Katibunan Ta Nenga Traha

  • Sharebar

Riba dia 14 di novèmber 1834 komandùr Schotborgh ta skirbi den su diario: "E mainta aki e supervisor ta informá mi ku e trabounan den plantashi pabou a keda kla. Ela disidí di laga e katibunan ku tabata traba den e plantashi pabou bin traba den e plantashi pariba".

E mésun dia ei e bombanan Bastiaan, Elias i Nicolaas ta bin informá Schotborgh ku e katibunan a nenga kategórikamente pa bandoná Rincon pa bai traba.

Relashoná ku e desaroyo nobo aki, komandùr Schotborgh ta yama su funshonarionan pa bolbe bini huntu. Ela informá nan di loke tabata pasando, esta ku e katibunan a bai asina leu di keda sin bai traba. Atrobe Schotborgh tabata ke sa kua tabata e sintimentu di su hendenan di konfiansa. E tabata ke pa nan ekspresá nan sintimentunan (" hun gevoelens mede te delen"). E mandatario tabata ke pa nan bis'é kua nan tabata kere tabata tabata e medidanan di mas efikas bou di e sirkumstansianan aki.

Un idea di komandùr tabata pa no partí rantsun pa e katibunan e siguiente di a, ku pues tabata djasabra 15 di novèmber. E komishon sinembargo a opiná ku bou di ningun kondishon mester tuma un desishon pa no entregá e rantsun semanal na e katibunan.

Mientrastantu e dia ei e bombanan ta informá Schotborgh-ku e situashon a kuminsá bira tenso den seno di e katibunan. Un katibu yamá Jan Hendrik Emerentiana a para Bastiaan i bis'é na su regreso na Rincon pa hiba un respondi pa "Sjoon Karel" i "Sjoon Weijgel". E dos personanan aki tabata dos funshonario haltu di gobièrnu. Bastiaan a kontestá Jan Hendrik Emerentiana ku e no ke tin nada di aber ku nan, esta e katibunan.

Jan Hendrik Emerentiana tabata ruman di Felixiana Emerentiana. Otro rumannan tabata entre otro Nicolaas, Martis, Pieter i Egidius. Felixiana Emerentiana a bira konosí pa e echo ku e tabatin un dedikashon enorme pa a kibra ku e kadena di esklabitut. Ela kumpra libertat di tur su seis yunan i por último a kumpra su mes libertat.

I.J.C. Weijgel aki pa hopi aña tabata un funshonario importante di gobièrnu. E tabata segundo supervisor. Por ehèmpel na aña 1816 e ta aparesé den e funshon aki i tambe na aña 1823 por topa kuné i naturalmente na aña 1834.

"Sjoon Karel" opviamente ta Carl Magnus Neumann, ku den tempu di e lantamentu aki tabata kapitan di indjan, algu manera un hefe di trabounan públiko. E funshon aki tabata igual tambe ku esun di promé supervisor.

Biniendo bek na e reunion di e "Commissie der Districtmeesters en Ambtenaren", e bia aki sí e komishon tabata di opinion ku, mirando ku e situashon a bira mas tenso, mester a hür un barku riba kuenta di gobièrnu, pa manda un mensahe pa Gezaghebber di Kòrsou, informando di loke tabata pasando. Huntu ku e mensahe aki lo a manda tambe e relato di e supervisor ku a pasa den e situashon di dia 10 di novèmber.

Mesora despues di e reunion Schotborgh a bai sinta tras di su lèsenar i a skirbi un relato ekstenso di e desaroyonan ku a tuma lugá e siman di 10 di novèmber 1834. Ela pone su remarkenan riba papel i, talbes mas importante, Schotborgh kier a haña di Gezaghebber di Kòrsou instrukshonnan kla di kan e lo mester komportá den futuro na momentu ku problemanan similar presentá. Esta lantamentu di katibunan.

Tambe Schotborgh kier a sa kan mester a atendé ku e hendenan liber di Rincon, ku hopi bia tabatin komportashonnan ku tabata laga hopi di deseá. E hendenan liber aki konstantemente tabata enbolbí den ladronisia di kabritu, miéntras ku nan tabata instigá tambe e katibunan hopi bia kontra gobièrnu.

For di tono di su diario por ripará kla ku Schotborgh tabata preokupá pa loke tabata pasando.

Echo ta ku e djasabra dia 15 di novèmber 1834 e katibunan a haña nan rantsun semanal. Pero e entrega a sosodé den un forma ku no tabata normal. A laga algun muhé i mucha entregá rantsun na e katibunan. E rantsun pa e djasabra ei a konsistí di 93 skèp i 19 kana di maishi, loke tabata e kantidat normal tambe di rantsun ku sa parti riba djasabra. Loke sí a hasi falta tabata e 16 kananan di ròm.

Un otro akshon ku Schotborgh a tuma e djasabra 15 di novèmber ei tabata pa hür un barku riba kuenta di gobièrnu pa e suma di fl.40,-. Ku e barku aki ela manda e dokumentashon relashoná ku e suseso di dia 10 di novèmber i e dianan despues. E dokumentashon tabata konsistí, aparte di e relato di e supervisor enbolbí den e insidente, tambe di prosèsvèrbalnan di e dos reunionnan ku tabatin di e "Commissie der Districtmeesters en Ambtenaren". Kon lo mester a bai atendé ku situashonnan asina den futuro i tambe ku e hendenan liber na Rincon ta puntonan ku tabata bini dilanti.

Un desishon importante tambe ku komandùr Schotborgh ta tuma e dia ei ta di laga yama e hendenan liber ku tabata forma un tipo di kuerpo boluntario pa situashonnan di emergensia. Tabata papia di "Burgerwacht". Segun Schotborgh, motibu ku.ela hasi un yamada riba e guardia aki pa mobilisá tabata pasobra e situashon a kuminsá eskalá i e tabata ke tin protekshon pa e propiedatnan di gobièrnu.

Anke ku kisas e base di e guardia di pueblo aki tabata boluntario, tòg por nota ku Schotborgh tabata paga nan. Tabata trata di 11 hende, ku tabata risibí kada un e suma di 50 sèn pa dia. Tambe Schotborgh a laga buska 2 kana di ròm djasabra 15 di novèmber for di mangazina di rei pa duna e 11 residentenan liber aki di Boneiru.

E pago tabata sosodé pa dia. Den e diario di Schotborgh por lesa ku tur e dianan siguiente, en todo kaso te na momentu ku e situashon tabata eksigí esaki, a sigui paga e miembronan di e guardia aki 50 sèn pa dia i tambe tabata duna nan ròm.