You are here

Introdukshon

  • Sharebar

E katibu tabata propiedat di gobièrnu òf shonnan. Tabatin sierto leinan pa protehá e katibu, pasobra e katibu tabatin su balor ekonómiko. N o opstante e leinan, e trato na hopi okashon tabata inhumano. E katibunan no tabatin edukashon i no tabatin propiedat òf sèn.

E posishon sosial di e katibunan tabata supordená na e klase blanku ku tabatin tur poder. Den e situashon aki e katibu mes ter a aseptá e norma i balornan di e klase blanku.

Blanku tabata sabí, bon i superior, miéntras ku pretu tabata mahos, malu i inferior.

E katibunan tabata oponé kontra e sistema dor di simulá malesa, tene akshon di morkoi, hasi daño na hèrmèntnan i rebeldiá.

Nos konosé rebelion di katibunan na Haiti (1789), Jamaica (1725) i na Sürnam katibunan a hui i bai biba banda di riunan i terorisá plantashi di e Hulandesnan.

Na Kòrsou tabatin lantamentu di katibunan na 1795 i e manera ku a resolvé e problema tabata un atvertensia pa e otro katibunan no pensa mes den un otro lantamentu.

Loke a pasa na Boneiru riba e fecha 10 di novèmber 1834 ta ku, segun e supervisor di e katibunan di rei, e trabou tabata bai hopi lento i ku mester a obligá e katibunan na mas ku un okashon pa traba mas lihé.

Dikon tabatin tan tu preshon pa traba mas lihé? Den e temporada di ougùstùs pa desèmber e katibunan tabata prepará tereno pa kuminsá sembra, limpia pos i tankinan pa yobida i tabata hasi reparashon na mangazina, tambe tabata kap palu i sera tranké. Na fin di òktober mayoria di e trabounan tabata kla.

Den novèmber 1834 e katibunan tabata traba riba tranké i mirando ku gobièrnu tabatin hopi problema ku hòrtamentu di kabritu i tabata sospechá e hendenan liber di koló (eks-katibu) di tabata harta kabritu ku yudansa . di e katibunan, e supervisor tabata ke pa e trabou kana mas lihé posibel, promé ku drenta luna di desèmber, luna di fiesta.

E akshon di e katibunan riba e fecha menshoná por ser konsiderá komo un akshon pa demonstrá nan malkontentu.

Bombanan mester a usa kabuya pa buta e katibunan traba mas lihé. Un di e katibunan no a gusta e tipo di abusu aki i a sali na defensa di su kompañero. E supervisor a bini ku e idea pa manda e katibu Fòrti na Playa, pero mesora e otro katibunan a tuma un posishon di solidaridat i a eksigí ku ta nan tur mester ser hibá Fòrti.

Asta ora komandùr a kai den e asuntu e katibunan a para fuerte i a laga e komandùr sa bon kla ku nan no ta bini Fòrti.

E akshon di morkoi a drenta un otro fase di no obedesé òrdu di gobièrnu i no traba. Komandùr ta alertá e guardia sivil i ta pidi asistensia for di Kòrsou i asta a pidi arma.

Na Boneiru komandùr a pidi e supervisor pa vigilá e situashon i wak pa e katibunan sigui traba, sperando kontesta di Kòrsou.

Komandùr no tabata kier a tuma niun riesgo. For di Kòrsou a bini Prokurador di Rei, Römer, i a resolvé e problema.

Ta di lamentá ku nos no sa kan a resolvé e problema, pero mirando kiko a pasa despues, kaminda a trasladá algun katibu pa e trabou den saliña di salu i obligá diferente famia pa bai biba den otro barionan, nos por bisa ku a engañá e katibunan.

Por bisa sí ku e resistensia di e katibunan tabata pa eksigí un trato mas humano.

E resistensia di dia 10 di novèmber 1834 ta siña nos ku semper mester sali pa eksigí un trato humano i ku e aktitut aki ta parti di e proseso yamá EMANSIPASHON.

Na 1834 den mondi di Rincon tabatin demonstrashon di fraternidat i deseo pa trato igual i anhelo pa libertat. Ta metanan di Revolushon Franses na 1789: "Libertat, Igualdat i Fraternidat".

E.A. Sealy. Boneiru, 31 di òktober 1997